મહારાષ્ટ્રના મુખ્યમંત્રી દેવેન્દ્ર ફડણવીસે રવિવારે કોંગ્રેસ પર આકરા પ્રહારો કર્યા હતા. તેમણે કહ્યું કે ચૂંટણી પંચ કે કોર્ટમાં કોઈ પુરાવા રજૂ કર્યા વિના મત ચોરી અને ચૂંટણીમાં ગેરરીતિના આક્ષેપો કરીને કોંગ્રેસને આગામી ચૂંટણીમાં પણ હારનો સામનો કરવો પડશે. તાજેતરમાં યોજાયેલી બિહાર ચૂંટણીમાં કોંગ્રેસની કારમી હાર પર પ્રતિક્રિયા આપતા ફડણવીસે આ ટિપ્પણી કરી હતી. 243 સભ્યોની બિહાર વિધાનસભાની ચૂંટણીમાં કોંગ્રેસને માત્ર છ બેઠકો મળી હતી.
છત્રપતિ સંભાજીનગર જિલ્લાના ચીખલથાણામાં એક કાર્યક્રમમાં ફડણવીસે કહ્યું હતું કે કોંગ્રેસે પોતાની રાજકીય કિસ્મત બદલવા માટે લોકો સાથે ફરીથી જોડાવું પડશે અને ઈમાનદારીથી તેમના મુદ્દા ઉઠાવવા પડશે. મુખ્યમંત્રીએ કહ્યું કે કોંગ્રેસ વોટ ચોરી અને ઈવીએમ જેવા મુદ્દા ઉઠાવે છે, પરંતુ જ્યારે કોર્ટ કે ચૂંટણી પંચ પુરાવા માંગે છે ત્યારે તેઓ પુરાવા આપવામાં નિષ્ફળ જાય છે.
ફડણવીસે કહ્યું કે જો કોંગ્રેસના લોકો પોતાનું વલણ નહીં સુધારે તો મારું અનુમાન છે કે આગામી સ્થાનિક ચૂંટણીમાં પણ તેમને આવી જ હારનો સામનો કરવો પડશે. તેમણે કહ્યું કે કોંગ્રેસે પાયાવિહોણા આક્ષેપો કરવાનું બંધ કરવું પડશે.
ફડણવીસે રાવસાહેબ દાનવે, મંત્રીઓ અતુલ સેવ, પંકજા મુંડે, મેઘના બોર્ડીકર અને સાંસદ ભાગવત કરાડની હાજરીમાં બીજેપીના નવા પ્રદેશ કાર્યાલયનું ઉદ્ઘાટન કર્યું. બિહાર વિધાનસભા ચૂંટણીમાં નેશનલ ડેમોક્રેટિક અલાયન્સ (NDA)ની જંગી જીત પર તેમણે કહ્યું કે દેશ વડાપ્રધાન નરેન્દ્ર મોદી પર ભરોસો કરી રહ્યો છે અને દેશની જનતા વિપક્ષના ખોટા નિવેદનનો સીધો જવાબ આપી રહી છે.
