કોલકાતા.કોલકાતામાં રમાયેલી પ્રથમ ટેસ્ટ મેચમાં દક્ષિણ આફ્રિકાએ ભારતને 30 રને હરાવ્યું હતું. ભારતીય ટીમે પ્રથમ દાવમાં 30 રનની લીડ મેળવી લીધી હતી, પરંતુ બોલરોના જોર પર દક્ષિણ આફ્રિકાએ પુનરાગમન કર્યું અને ભારતને હરાવીને બે મેચની શ્રેણીમાં 1-0ની લીડ મેળવી લીધી. દક્ષિણ આફ્રિકા બીજા દાવમાં 153 રનમાં ઓલઆઉટ થઈ ગયું હતું અને તેણે 123 રનની લીડ લીધા બાદ ભારતને 124 રનનો ટાર્ગેટ આપ્યો હતો. બીજી ઈનિંગમાં ભારતની બેટિંગ ઘણી નબળી રહી હતી અને બીજા સેશનમાં જ ટીમ 93 રનમાં ઓલઆઉટ થઈ ગઈ હતી.
ભારત તરફથી સૌથી વધુ રન વોશિંગ્ટન સુંદરે બનાવ્યા હતા જે 31 રન બનાવીને આઉટ થયો હતો. અક્ષર પટેલ સારી બેટિંગ કરી રહ્યો હતો અને તેણે કેશવ મહારાજ પર સતત ચોગ્ગા અને છગ્ગા ફટકારીને ભારતને જીત અપાવવાનો પ્રયાસ કર્યો હતો, પરંતુ તે ખરાબ શોટ રમીને પેવેલિયન પરત ફર્યો હતો અને ત્યારપછી કેશવે મોહમ્મદ સિરાજને આઉટ કરીને ભારતની ઇનિંગ્સને સમેટી હતી. કેપ્ટન શુભમન ગિલ બીજી ઇનિંગમાં પણ ભારત તરફથી બેટિંગ કરવા આવ્યો ન હતો.
ભારત તરફથી વોશિંગ્ટન અને અક્ષર ઉપરાંત રવિન્દ્ર જાડેજાએ 18 રન, ધ્રુવ જુરેલ 13, રિષભ પંત 2, કેએલ રાહુલ 1 અને કુલદીપ યાદવે 1 રન બનાવ્યો હતો. જસપ્રીત બુમરાહ ખાતું ખોલાવ્યા વિના અણનમ પાછો ફર્યો હતો. દક્ષિણ આફ્રિકા તરફથી સિમોન હાર્મરે ચાર વિકેટ લીધી હતી જ્યારે માર્કો જાનસેન અને કેશવ મહારાજે બે-બે વિકેટ લીધી હતી. આ સાથે જ એડન માર્કરામને એક વિકેટ મળી હતી.
