નવી દિલ્હી: T20 વર્લ્ડ કપ 2026માં મંગળવારે ઇંગ્લેન્ડ અને પાકિસ્તાન વચ્ચે સુપર-8 મેચ રમાઈ હતી. કેપ્ટન હેરી બ્રૂકની વિસ્ફોટક સદીના આધારે ઈંગ્લેન્ડે 165 રનનો લક્ષ્યાંક હાંસલ કરીને સેમિફાઈનલમાં પ્રવેશ મેળવ્યો હતો. હેરી બ્રુક ટી20 વર્લ્ડ કપના ઈતિહાસમાં ચોથો બેટ્સમેન બન્યો જેણે પીછો કરતી વખતે સદી ફટકારી.
બ્રુકે પાકિસ્તાન સામેની મેચમાં પોતાને પ્રમોટ કર્યો હતો અને ત્રીજા નંબર પર બેટિંગ કરવા આવ્યો હતો. આનો ફાયદો ઈંગ્લેન્ડને થયો. 28 બોલમાં અડધી સદી ફટકારનાર બ્રુકે 50 બોલમાં સદી ફટકારીને ઈંગ્લેન્ડને જીત અપાવી હતી. બ્રુકે 51 બોલમાં 10 ચોગ્ગા અને 4 છગ્ગાની મદદથી 100 રન બનાવ્યા હતા.
બ્રુક ટી20 વર્લ્ડ કપમાં સદી ફટકારનાર પ્રથમ કેપ્ટન છે. હેરી બ્રુક ઉપરાંત ત્રણ બેટ્સમેન એલેક્સ હેલ્સ, ક્રિસ ગેલ અને પથમ નિસાન્કાએ ટી20 વર્લ્ડ કપના ઈતિહાસમાં ચેઝ કરતી વખતે સદી ફટકારી છે.
T20 વર્લ્ડ કપ 2014માં શ્રીલંકા સામે પીછો કરતા ઈંગ્લેન્ડના ઓપનર એલેક્સ હેલ્સે સદી ફટકારી હતી. ઈંગ્લેન્ડે શ્રીલંકાએ આપેલા 190 રનના લક્ષ્યાંકને 19.2 ઓવરમાં હાંસલ કરી લીધો હતો. ઇનિંગની શરૂઆત કરવા આવેલા હેલ્સે 64 બોલમાં 6 છગ્ગા અને 11 ચોગ્ગાની મદદથી 116 રન બનાવ્યા બાદ અણનમ રહ્યો હતો.
T20 વર્લ્ડ કપ 2016માં ક્રિસ ગેલે ઈંગ્લેન્ડ સામે સદી ફટકારી હતી.ઈંગ્લેન્ડ દ્વારા આપવામાં આવેલા 183 રનના ટાર્ગેટને વેસ્ટ ઈન્ડિઝે 18.1 ઓવરમાં હાંસલ કરી લીધો હતો. વેસ્ટ ઈન્ડિઝ માટે ઈનિંગની શરૂઆત કરવા આવેલા ગેઈલે 48 બોલમાં 11 સિક્સ અને 5 ફોરની મદદથી 100 રન બનાવ્યા બાદ અણનમ રહ્યો હતો.
પથુમ નિસાન્કાએ એ જ વર્લ્ડ કપમાં ઓસ્ટ્રેલિયા સામે શાનદાર સદી ફટકારીને શ્રીલંકાને જીત તરફ દોરી હતી. ઓસ્ટ્રેલિયાએ આપેલા 182 રનના લક્ષ્યાંકને શ્રીલંકાએ 18 ઓવરમાં 2 વિકેટે 184 રન બનાવીને હાંસલ કરી લીધો હતો. શ્રીલંકાના ઓપનર પથુમ નિસાન્કાએ 52 બોલમાં 5 છગ્ગા અને 10 ચોગ્ગાની મદદથી 100 રન બનાવ્યા બાદ અણનમ રહ્યો હતો. T20 વર્લ્ડ કપના ઈતિહાસમાં લક્ષ્યનો પીછો કરતી વખતે સદી ફટકારનાર 4 બેટ્સમેનમાંથી હેરી બ્રુક સિવાયના તમામ અણનમ રહ્યા છે.
