નવી દિલ્હીઃ T20 વર્લ્ડ કપ 2026ની ગ્રુપ Dની મેચમાં અફઘાનિસ્તાન UAE ને હરાવ્યું. વર્લ્ડ કપમાં અફઘાનિસ્તાનની આ પ્રથમ જીત છે. સોમવારે અરુણ જેટલી ક્રિકેટ સ્ટેડિયમમાં રમાયેલી મેચમાં UAEએ અફઘાનિસ્તાનને જીતવા માટે 161 રનનો ટાર્ગેટ આપ્યો હતો. લક્ષ્યનો પીછો કરતા અફઘાનિસ્તાનની શરૂઆત ખરાબ રહી હતી. ઓપનર રહેમાનુલ્લા ગુરબાઝ ખાતુ ખોલાવ્યા વગર આઉટ થયો હતો. ઇબ્રાહિમ ઝદરાન અને ગુલબદ્દીન નાયબે બીજી વિકેટ માટે 40 રન જોડ્યા હતા. નાયબ 12 બોલમાં 13 રન બનાવીને આઉટ થયો હતો. આ પછી નિયમિત અંતરે વિકેટો પડતી રહી.
સેદીકુલ્લાહ અટલ 14 બોલમાં 16 રન બનાવીને આઉટ થયો હતો. ઝદરાને અડધી સદી ફટકારી હતી. તે 41 બોલમાં 53 રનની ઇનિંગ રમીને આઉટ થયો હતો. દરવિશ રસૂલીએ 23 બોલમાં 3 ચોગ્ગા અને 1 છગ્ગાની મદદથી 33 રન અને અઝમતુલ્લા ઉમરઝાઈએ 21 બોલમાં 3 છગ્ગા અને 2 ચોગ્ગાની મદદથી અણનમ 40 રન બનાવ્યા હતા. રસૂલી અને ઓમરઝાઈની ઈનિંગ્સના કારણે અફઘાનિસ્તાને 19.2 ઓવરમાં 5 વિકેટે 162 રન બનાવીને 5 વિકેટે મેચ જીતી લીધી હતી.
આ પહેલા ટોસ હારીને પ્રથમ બેટિંગ કરતા UAEએ 9 વિકેટે 160 રન બનાવ્યા હતા. UAE માટે શોએબ ખાને 48 બોલમાં 4 સિક્સ અને 6 ફોરની મદદથી 68 રનની ઇનિંગ રમી હતી. આ સિવાય આલીશાન સરાફુએ 31 બોલમાં 3 ચોગ્ગા અને 2 છગ્ગાની મદદથી 40 રન બનાવ્યા હતા.
અફઘાનિસ્તાન માટે ઓલરાઉન્ડર અઝમતુલ્લા ઓમરઝાઈએ શ્રેષ્ઠ બોલિંગ કરી હતી. ઓમરઝાઈએ 4 ઓવરમાં 15 રન આપીને 4 વિકેટ લીધી હતી. મુજીબ ઉર રહેમાને 4 ઓવરમાં 31 રન આપીને 2 વિકેટ લીધી હતી. રાશિદ ખાને 4 ઓવરમાં 24 રન આપીને 1 વિકેટ લીધી હતી.
