દક્ષિણ કોરિયાની અદાલતે દેશના પૂર્વ રાષ્ટ્રપતિ યુન સુક યોલને દોષિત ઠેરવ્યા છે અને ડિસેમ્બર 2024માં ‘માર્શલ લો’ લાગુ કરવા બદલ તેમને આજીવન કેદની સજા ફટકારી છે. અદાલતમાં ચુકાદો આપતા, ન્યાયાધીશ જી કુઇ-યુને કહ્યું કે અદાલતે યુનને સેના અને પોલીસ દળોને એકત્ર કરવા, નેતાઓની ધરપકડ કરવા અને ‘નેશનલ એસેમ્બલી’ પર ગેરકાયદેસર રીતે કબજો કરવાના પ્રયાસમાં ‘થોડા સમય’ માટે નિરંકુશ શાસન સ્થાપિત કરવા માટે દોષિત ઠેરવ્યા છે.
દરમિયાન, સ્પેશિયલ પ્રોસિક્યુટરે યુન માટે મૃત્યુદંડની માંગ કરતા કહ્યું કે તેના કાર્યોથી દેશની લોકશાહીને ખતરો છે અને તે સૌથી આકરી સજાને પાત્ર છે. જો કે, મોટાભાગના વિશ્લેષકોએ તેને આજીવન કેદની સજાની અપેક્ષા રાખી હતી કારણ કે આ સમગ્ર ઘટનામાં કોઈ જાનહાનિ થઈ ન હતી. તમને જણાવી દઈએ કે, દક્ષિણ કોરિયાએ 1997થી મૃત્યુદંડની સજા પામેલા કોઈ કેદીને ફાંસી આપી નથી.
અદાલતે યુનના ‘માર્શલ લો’ હુકમનામું લાગુ કરવામાં સામેલ કેટલાક ભૂતપૂર્વ લશ્કરી અને પોલીસ અધિકારીઓને પણ દોષિત ઠેરવ્યા અને સજા સંભળાવી, જેમાં ભૂતપૂર્વ સંરક્ષણ પ્રધાન કિમ યોંગ-હ્યુનનો સમાવેશ થાય છે, જેમને તેની યોજના બનાવવા અને લશ્કરને એકત્ર કરવામાં તેમની કેન્દ્રીય ભૂમિકા માટે 30 વર્ષની જેલની સજા મળી હતી.
યુનને કોર્ટમાં લઈ જવામાં આવે તે પહેલાં, સેંકડો પોલીસ અધિકારીઓ તેના પર નજીકથી નજર રાખતા હતા. તેમના સમર્થકો ન્યાયિક સંકુલની બહાર ભેગા થઈને વિરોધ પ્રદર્શન કરી રહ્યા હતા. યુનને લઈ જતી જેલની બસ ત્યાંથી પસાર થઈ ત્યારે યૂનના સમર્થનમાં સૂત્રોચ્ચાર વધુ જોરદાર બન્યા. આ દરમિયાન, યુનના ટીકાકારો પણ નજીકમાં એકઠા થયા અને તેમના માટે મૃત્યુદંડની માંગ કરવા લાગ્યા.
