બેંગલુરુમાં સોફ્ટવેર એન્જિનિયર સાથે છેતરપિંડીનો એક ચોંકાવનારો કિસ્સો પ્રકાશમાં આવ્યો છે. તેણે દાવો કર્યો હતો કે તેણે ઈ-કોમર્સ કંપની પાસેથી 1 લાખ 86 હજાર રૂપિયાની ઓનલાઈન પેમેન્ટ કરીને સેમસંગ ગેલેક્સી જી ફોલ્ડ 7 સ્માર્ટફોનનો ઓર્ડર આપ્યો હતો, પરંતુ સ્માર્ટફોનનું બોક્સ ખોલતા તેને માત્ર પથ્થરનો ટુકડો (ટાઈલ) મળ્યો હતો. પોલીસના જણાવ્યા અનુસાર, યેલાચેનાહલ્લીના રહેવાસી પ્રેમાનંદે ફોન મંગાવ્યો હતો અને ઘટના બાદ પોલીસ ફરિયાદ નોંધાવી હતી.
ફરિયાદ મુજબ, પ્રેમાનંદે 14 ઓક્ટોબરે ઈ-કોમર્સ પ્લેટફોર્મ પરથી ફોન ખરીદ્યો હતો અને તેના ક્રેડિટ કાર્ડનો ઉપયોગ કરીને ઓનલાઈન પેમેન્ટ કર્યું હતું. તેને 19 ઓક્ટોબરે સાંજે 4:16 કલાકે સ્માર્ટફોનના સપ્લાયના નામે એક બોક્સ મળ્યું હતું. બોક્સ ખોલતી વખતે તેણે વીડિયો બનાવ્યો. બોક્સમાં સ્માર્ટફોનને બદલે માત્ર સફેદ ચોરસ ટાઈલનો ટુકડો જોઈને તે ચોંકી ગયો.
NCRPમાં ફરિયાદ નોંધાવી
પ્રેમાનંદે પહેલા નેશનલ સાયબર ક્રાઈમ રિપોર્ટિંગ પોર્ટલ (NCRP)માં ફરિયાદ નોંધાવી અને બાદમાં સ્થાનિક પોલીસનો સંપર્ક કર્યો. જેણે ભારતીય ન્યાય સંહિતાની કલમ 318(4), છેતરપિંડી અને ઇન્ફોર્મેશન ટેક્નોલોજી એક્ટની કલમ 66D (કોમ્પ્યુટર સંસાધનોનો ઉપયોગ કરીને છેતરપિંડી) હેઠળ એફઆઈઆર નોંધાવી હતી. પોલીસે જણાવ્યું કે આ કેસની તપાસ ચાલુ છે. આ સમાચારને લઈને સોશિયલ મીડિયા પર હોબાળો મચી ગયો છે. ઈન્ટરનેટ યુઝર્સ ઈ-કોમર્સ કંપની સામે કડક કાર્યવાહીની માંગ કરી રહ્યા છે.
