તાજેતરમાં વેનેઝુએલામાં અચાનક હુમલો કર્યા બાદ અમેરિકા હવે યુરોપમાં એક નવું ષડયંત્ર રચી રહ્યું છે. અહેવાલો અનુસાર, છેલ્લા કેટલાક દિવસોમાં ભારે હથિયારોથી સજ્જ ડઝનેક અમેરિકન સૈન્ય વિમાન બ્રિટનમાં ઉતર્યા છે. અમેરિકાના આ પગલાથી તણાવ વધુ વધી ગયો છે અને અમેરિકાનું આગામી નિશાન કોણ હશે તે અંગે અટકળો લગાવવામાં આવી રહી છે.
ધ ટાઈમ્સ ઓફ ઈન્ડિયાના એક અહેવાલ અનુસાર, ઓછામાં ઓછા 14 C-17 ગ્લોબમાસ્ટર III કાર્ગો એરક્રાફ્ટ અને 2 AC-130J ઘોસ્ટ રાઈડર ગનશીપ બ્રિટનના રોયલ એર ફોર્સ (RAF)ના ફેરફોર્ડ (ગ્લુસેસ્ટરશાયર), મિલ્ડનહોલ અને લેકનહેથ (સફોક) બેઝ પર લેન્ડ કરવામાં આવ્યા છે. તમને જણાવી દઈએ કે C-17 ગ્લોબમાસ્ટર એક મોટું યુદ્ધ વાહક વિમાન છે જેનો ઉપયોગ લાંબા અંતરની એરલિફ્ટ મિશન માટે થાય છે. જ્યારે AC-130J ગનશિપમાં તોપો, બોમ્બ અને મિસાઈલનું પરિવહન થાય છે.
અમેરિકાની મોટી તૈયારી
આ સિવાય ઓછામાં ઓછા પાંચ MH-60M બ્લેક હોક હેલિકોપ્ટર અને એક MH-47G ચિનૂક હેલિકોપ્ટર પણ UK હેંગર્સમાં જોવા મળ્યા છે. આ હેલિકોપ્ટરનો ઉપયોગ વિશેષ કામગીરી દરમિયાન લોજિસ્ટિક્સ માટે થાય છે. દરમિયાન મંગળવારે, એક અમેરિકન KC-135R સ્ટ્રેટોટેન્કર રિફ્યુઅલિંગ એરક્રાફ્ટ, જે લાંબી ફ્લાઇટ્સ માટે રિફ્યુઅલ કરવાની ક્ષમતા ધરાવે છે, તે પણ મિલ્ડનહોલ ખાતે ઉતર્યું હતું.
જ્યોર્જિયાના હન્ટર આર્મી એરફિલ્ડ અને કેન્ટુકીના ફોર્ટ કેમ્પબેલથી પણ કેટલાક વિમાનોએ ઉડાન ભરી હોવાથી મોટી કાર્યવાહીનો ભય વ્યક્ત કરવામાં આવી રહ્યો છે. આ રેજિમેન્ટને ‘નાઇટ સ્ટોકર્સ’ તરીકે ઓળખવામાં આવે છે અને તેણે વેનેઝુએલા પરના હુમલા અને માદુરોને પકડવાના મિશનમાં મહત્વની ભૂમિકા ભજવી હતી.
