ડોનાલ્ડ ટ્રમ્પ ટેરિફ: સુપ્રીમ કોર્ટના તાજેતરના નિર્ણયને અવગણીને અમેરિકી રાષ્ટ્રપતિ ડોનાલ્ડ ટ્રમ્પે વૈશ્વિક સ્તરે આયાતી સામાન પર ટેરિફ વધારવાની મોટી જાહેરાત કરી છે. શુક્રવારે, સુપ્રીમ કોર્ટે ટ્રમ્પ વહીવટીતંત્ર દ્વારા લાદવામાં આવેલા ઊંચા ટેરિફને ગેરબંધારણીય જાહેર કર્યા હતા, પરંતુ એક દિવસ પછી ટ્રમ્પે તેમની નીતિને વધુ કડક બનાવવાનો નિર્ણય કર્યો.
તેમના સોશિયલ મીડિયા પ્લેટફોર્મ “ટ્રુથ સોશિયલ” પર પોસ્ટ કરીને ટ્રમ્પે જાહેરાત કરી કે હવેથી તમામ દેશોમાંથી આયાત પર 10 ટકાને બદલે 15 ટકા ટેરિફ લાગશે. આ પગલું યુએસની વેપાર નીતિમાં નોંધપાત્ર ફેરફારનો સંકેત આપે છે, ખાસ કરીને એવા સમયે જ્યારે સુપ્રીમ કોર્ટનો આદેશ તેમની વિરુદ્ધ હતો.
ટ્રમ્પનો આ નિર્ણય એવા સમયે આવ્યો છે જ્યારે વૈશ્વિક વેપાર સંબંધોમાં સતત બદલાવ આવી રહ્યા છે અને આ પગલું આંતરરાષ્ટ્રીય વેપારમાં વધુ ગૂંચવણો સર્જી શકે છે. ટ્રમ્પે સોશિયલ મીડિયા પર પોસ્ટ કર્યું કે અમેરિકા હવે વિશ્વભરના દેશો પર લાદવામાં આવેલા 10 ટકા ટેરિફને વધારીને 15 ટકા કરી રહ્યું છે. ટ્રમ્પે કહ્યું કે ઘણા દેશોએ અમેરિકાને દાયકાઓ સુધી લૂંટ્યું છે અને તેના જવાબમાં આ નિર્ણય લેવામાં આવ્યો છે. અમેરિકી રાષ્ટ્રપતિએ કહ્યું કે તેમની સરકારે કાયદાના દાયરામાં આ પગલું લીધું છે અને તેનો ઉપયોગ પહેલા પણ કરવામાં આવ્યો છે.
ડોનાલ્ડ ટ્રમ્પે ટ્રુથ સોશિયલ પર પોસ્ટ કરીને કહ્યું, ‘યુનાઇટેડ સ્ટેટ્સના રાષ્ટ્રપતિ તરીકે, હું તાત્કાલિક અસરથી વૈશ્વિક ટેરિફ 10 ટકાથી 15 ટકા વધારી રહ્યો છું. હું આવ્યો ત્યાં સુધી ઘણા દેશો અમેરિકાને દાયકાઓ સુધી કોઈ પણ દંડ વિના લૂંટતા હતા. “આગામી કેટલાક મહિનાઓમાં, ટ્રમ્પ એડમિનિસ્ટ્રેશન નવા અને કાનૂની ટેરિફ સેટ કરશે જે અમેરિકાને ફરીથી મહાન બનાવવાની અમારી સફળ પ્રક્રિયાને ચાલુ રાખશે.”
આ પણ વાંચોઃ ખૈબર પખ્તુનખ્વામાં ફરી આત્મઘાતી હુમલો, 15 દિવસમાં ત્રીજી ઘટના; લેફ્ટનન્ટ કર્નલ સહિત 3ના મોત
