વોશિંગ્ટનમાં આયોજિત ‘બોર્ડ ઓફ પીસ’ના ઉદ્ઘાટન સત્રમાં એક દ્રશ્ય જોવા મળ્યું જેની આંતરરાષ્ટ્રીય મીડિયામાં જોરશોરથી ચર્ચા થઈ રહી છે. અમેરિકાના રાષ્ટ્રપતિ ડોનાલ્ડ ટ્રમ્પે પોતાના સંબોધન દરમિયાન ભારતના વડાપ્રધાન નરેન્દ્ર મોદીને ન માત્ર પોતાના શ્રેષ્ઠ મિત્ર ગણાવ્યા, પરંતુ પાકિસ્તાનના વડાપ્રધાન શાહબાઝ શરીફને તેમના ભાષણની વચ્ચે ઉભા કરીને ભારત-પાકિસ્તાન શાંતિનો સંપૂર્ણ શ્રેય પણ લીધો. ટ્રમ્પ ભારત-પાકિસ્તાન સંઘર્ષને રોકવાના તેમના દાવાનો ઉલ્લેખ કરી રહ્યા હતા. શાહબાઝ શરીફ તરફ જોઈને તેમને ઉભા થવા કહ્યું. પાકિસ્તાની વડાપ્રધાન ઉભા થતાની સાથે જ ટ્રમ્પે પોતાની આગવી શૈલીમાં વડાપ્રધાન મોદી અને ભારતના વખાણ કરવાનું શરૂ કરી દીધું હતું.
“ભારત અને પાકિસ્તાન… તે એક મોટી વાત હતી. મેં વડા પ્રધાન મોદી સાથે વાત કરી છે. તેઓ ખૂબ જ ઉત્સાહિત છે અને વાસ્તવમાં અત્યારે આ કાર્યક્રમ જોઈ રહ્યા છે,” ટ્રમ્પે વિશ્વના અનેક નેતાઓ અને ઉપસ્થિત મીડિયાની સામે કહ્યું.
ટ્રમ્પે વધુમાં કહ્યું, “ભારત અને પાકિસ્તાન, બંનેનો ખૂબ ખૂબ આભાર. મોદી એક મહાન માણસ છે અને મારા ખૂબ સારા મિત્ર છે.” આ દ્રશ્ય ખૂબ જ રસપ્રદ હતું કારણ કે જ્યારે પાકિસ્તાનના વડા પ્રધાન પ્રોટોકોલ મુજબ ઉભા થઈને આ બધું સાંભળી રહ્યા હતા, ત્યારે ભારત આ બેઠકમાં માત્ર એક ‘નિરીક્ષક’ તરીકે હાજર હતું અને પીએમ મોદી પોતે ત્યાં હાજર ન હતા.
આ દરમિયાન ટ્રમ્પે ફરી કહ્યું કે તેમણે ગયા વર્ષે માત્ર એક ફોન કોલથી ભારત-પાકિસ્તાન યુદ્ધ અટકાવ્યું હતું. “જ્યારે મને ખબર પડી કે બે દેશો લડી રહ્યા છે અને વિમાનો તોડી પાડવામાં આવી રહ્યા છે, ત્યારે મેં ફોન ઉપાડ્યો અને કહ્યું કે જો યુદ્ધ બંધ નહીં થાય તો હું બંને દેશો પર 200 ટકા વેપાર ટેરિફ લાદીશ,” તેમણે કહ્યું.
