નવી દિલ્હી: ભારત મંડપમ ખાતે આયોજિત ઈન્ડિયા એઆઈ ઈમ્પેક્ટ સમિટ દરમિયાન ઈન્ડિયન યુથ કોંગ્રેસના કાર્યકરો દ્વારા કરવામાં આવેલા ‘શર્ટલેસ વિરોધ’ના સંદર્ભમાં દિલ્હી પોલીસે ઈન્ડિયન યુથ કોંગ્રેસના રાષ્ટ્રીય અધ્યક્ષ ઉદય ભાનુ ચિબની ધરપકડ કરી છે. કોંગ્રેસ સાંસદ રાહુલ ગાંધીએ આ ધરપકડનો વિરોધ કર્યો છે.
કોંગ્રેસના સાંસદ રાહુલ ગાંધીએ કહ્યું કે ઉદય ભાનુ ચિબની ધરપકડ તાનાશાહી વલણ અને કાયરતાનો પુરાવો છે. સોશિયલ મીડિયા પ્લેટફોર્મ X પર પોસ્ટ કરતા કોંગ્રેસ સાંસદ રાહુલ ગાંધીએ લખ્યું કે શાંતિપૂર્ણ વિરોધ એ આપણી ઐતિહાસિક ધરોહર છે. તે આપણા લોહીમાં છે અને દરેક ભારતીયનો લોકતાંત્રિક અધિકાર છે. મને યુથ કોંગ્રેસના મારા બબ્બર શેર સાથીદારો પર ગર્વ છે, જેમણે નિર્ભયતાથી દેશના હિતમાં પોતાનો અવાજ ઉઠાવ્યો છે. અમેરિકા સાથેના વેપાર સોદામાં દેશના હિત સાથે ચેડા કરવામાં આવ્યા છે. આ કરાર આપણા ખેડૂતો અને કાપડ ઉદ્યોગને નુકસાન પહોંચાડશે અને આપણો ડેટા અમેરિકાના હાથમાં મૂકશે.
તેમણે વધુમાં જણાવ્યું હતું કે, “આ સત્ય દેશ સમક્ષ મુકવા બદલ યુથ કોંગ્રેસના પ્રમુખ ઉદય ભાનુ ચિબ અને ભારતીય યુથ કોંગ્રેસના અન્ય સાથીઓની ધરપકડ એ સરમુખત્યારશાહી વલણ અને કાયરતાનો પુરાવો છે. કોંગ્રેસ પાર્ટી અને હું અમારા બબ્બર શેર સાથીઓ સાથે અડગ છીએ. સત્તાને સત્યનો અરીસો બતાવવો એ ગુનો નથી, તે દેશભક્તિથી ડરે છે અને સત્ય સાથે ડર છે.”
દિલ્હી પોલીસના સૂત્રોના જણાવ્યા અનુસાર, પોલીસ એ જાણવાનો પ્રયાસ કરી રહી છે કે AI સમિટ દરમિયાન યૂથ કોંગ્રેસના પ્રદર્શન પાછળ કયા પ્રકારની સંગઠિત યોજના હતી. હાલ આ કેસની તપાસ ચાલી રહી છે. આ પહેલા સોમવારે આરોપી જીતેન્દ્ર યાદવ, રાજા ગુર્જર અને અજય કુમારની અન્યો સાથે ધરપકડ કરવામાં આવી હતી.
તમને જણાવી દઈએ કે AI સમિટમાં યૂથ કોંગ્રેસ દ્વારા વિરોધ પ્રદર્શન બાદ પોલીસે જાહેર શાંતિ ભંગ કરવા સહિત વિવિધ કલમો હેઠળ કેસ નોંધ્યો હતો. આ કેસમાં અત્યાર સુધીમાં ઉદય ભાનુ ચિબ સહિત કુલ આઠ લોકોની ધરપકડ કરવામાં આવી છે.
