ઈરાનમાં ચાલી રહેલા યુદ્ધને કારણે વૈશ્વિક ઉર્જા સંકટ ઉભું થવા લાગ્યું છે. તેની અસર પડોશી દેશ પાકિસ્તાને સૌથી પહેલા જોઈ હતી. શાહબાઝ સરકારે પેટ્રોલ અને ‘હાઈ-સ્પીડ ડીઝલ’ના ભાવમાં પાકિસ્તાની રૂપિયા 55 પ્રતિ લીટરનો વધારો કર્યો છે, જે અત્યાર સુધીનો સૌથી મોટો વધારો છે. શુક્રવારે રાત્રે પાકિસ્તાન સરકારના મંત્રીઓએ પેટ્રોલના ભાવમાં વધારો કરવાની જાહેરાત કરી હતી. આ સાથે તેમણે પોતાના લોકોને ખાતરી આપવાનો પણ પ્રયાસ કર્યો કે દેશમાં પર્યાપ્ત પેટ્રોલિયમ ભંડાર છે.
પાકિસ્તાની અખબાર ડૉનના અહેવાલ મુજબ, શરીફ સરકાર દ્વારા કરવામાં આવેલા આ વધારા બાદ, ‘હાઈ-સ્પીડ ડીઝલ’ની એક્સ-ડેપો કિંમત આગામી સપ્તાહ માટે 335.86 પાકિસ્તાની રૂપિયા પ્રતિ લીટર નક્કી કરવામાં આવી છે, જે પહેલા 280.86 રૂપિયા પ્રતિ લીટર હતી એટલે કે લગભગ 20 ટકાનો વધારો. એ જ રીતે, પેટ્રોલની એક્સ-ડેપો કિંમત 266.17 રૂપિયા પ્રતિ લિટરથી વધારીને 321.17 રૂપિયા પ્રતિ લિટર કરવામાં આવી છે, જે લગભગ 17 ટકાનો વધારો દર્શાવે છે.
પાકિસ્તાનના પેટ્રોલિયમ પ્રધાન અલી પરવેઝ મલિકે જણાવ્યું હતું કે પશ્ચિમ એશિયામાં ચાલી રહેલા સંઘર્ષે સમગ્ર ક્ષેત્રમાં અનિશ્ચિતતા ઊભી કરી છે, જેનાથી વૈશ્વિક ઊર્જા પુરવઠો અને કિંમતો પર અસર પડી છે. પાકિસ્તાનનો તેલનો પુરવઠો મોટાભાગે સ્ટ્રેટ ઓફ હોર્મુઝ પર નિર્ભર છે, વર્તમાન પરિસ્થિતિને કારણે આ પુરવઠો પ્રભાવિત થયો છે. તેમણે કહ્યું, “પડોશી દેશમાં શરૂ થયેલી આગ હવે સમગ્ર વિસ્તારમાં ફેલાઈ ગઈ છે. અમને ખબર નથી કે આ સંકટ કેટલો સમય ચાલશે અને તેના અંત માટે કોઈ સ્પષ્ટ સમયરેખા નથી. જોકે, પાકિસ્તાનને તેલ સપ્લાય કરવા માટે બે જહાજો વૈકલ્પિક માર્ગો દ્વારા આવી રહ્યા છે.”
મંત્રીએ કહ્યું કે સરકાર પુરવઠાની સ્થિતિ પર નજર રાખી રહી છે. આ સાથે તેમણે સંકટની આ સ્થિતિમાં સંગ્રહખોરી કરનારા અથવા કૃત્રિમ અછત સર્જનારાઓને કડક ચેતવણી પણ આપી છે. મલિકે જણાવ્યું હતું કે સરકાર વૈશ્વિક તેલ બજાર અનુસાર સાપ્તાહિક ધોરણે પેટ્રોલની કિંમતોની સતત સમીક્ષા કરશે. જેમ જેમ આંતરરાષ્ટ્રીય સ્થિતિ સુધરશે તેમ તેમ અમે કિંમતોમાં સમાન રીતે ઘટાડો કરીશું.
