વેનેઝુએલા પર અમેરિકાના હુમલા અને રાષ્ટ્રપતિ માદુરોની ધરપકડ બાદ અમેરિકી રાષ્ટ્રપતિ ડોનાલ્ડ ટ્રમ્પે વેનેઝુએલા પર શાસન કરવાની પોતાની યોજના જાહેર કરી છે. ટ્રમ્પની આ યોજનામાં વિપક્ષી નેતા મારિયા કોરિના મચાડોનું નામ ક્યાંય નથી. ટ્રમ્પે જાહેરમાં એક નિવેદનમાં કહ્યું હતું કે વેનેઝુએલામાં મચાડોને સત્તા ન આપી શકાય. આ પછી નોબેલ શાંતિ પુરસ્કાર વિજેતા મચાડોનું મોટું નિવેદન સામે આવ્યું છે. તેણીએ કહ્યું છે કે તે તેના નોબેલ શાંતિ પુરસ્કારને ટ્રમ્પ સાથે શેર કરવા માંગે છે.
અગાઉ માદુરોની ધરપકડના થોડા કલાકો બાદ મચાડોએ કહ્યું હતું કે આઝાદીનો સમય આવી ગયો છે. તેમણે એવી આશા પણ વ્યક્ત કરી હતી કે હવે વિપક્ષ દેશની કમાન સંભાળવા તરફ આગળ વધી શકે છે. જો કે, તેમની આશા પર પાણી ફરી વળ્યું જ્યારે ટ્રમ્પે સ્પષ્ટપણે કહ્યું કે તેઓ મચાડોને સત્તામાં લાવવામાં રસ ધરાવતા નથી. ટ્રમ્પે કહ્યું કે મચાડોને દેશમાં ન તો પૂરતું સમર્થન છે કે ન તો સન્માન છે.
મચાડોએ શું કહ્યું?
મચાડોએ ફોક્સ ન્યૂઝ સાથેની વાતચીતમાં કહ્યું કે નોબેલ મળવાના સમાચાર મળતા જ તેમણે આ એવોર્ડ ટ્રમ્પને સમર્પિત કર્યો. તેણે એ પણ જણાવ્યું કે નોબેલની જાહેરાતના દિવસે તેણે ટ્રમ્પ સાથે વાત કરી હતી, પરંતુ તે પછી કોઈ સંપર્ક થયો ન હતો. મચાડોએ કહ્યું છે કે તે ટૂંક સમયમાં તેના દેશમાં પરત ફરવાની યોજના ધરાવે છે.
આ સમયગાળા દરમિયાન મચાડોએ તેમના દેશમાં અમેરિકન કાર્યવાહીની પણ પ્રશંસા કરી હતી. “3 જાન્યુઆરીના રોજ જે બન્યું તે ઇતિહાસમાં લખાઈ જશે. તે દિવસે ન્યાયે જુલમને હરાવ્યો. આ માત્ર વેનેઝુએલા માટે જ નહીં, પરંતુ સમગ્ર માનવતા માટે મહત્વપૂર્ણ છે,” તેમણે એક નિવેદનમાં જણાવ્યું હતું. વેનેઝુએલામાં સરમુખત્યારશાહી સામેના સંઘર્ષ બદલ મચાડોને 2025માં નોબેલ શાંતિ પુરસ્કાર મળ્યો હતો.
