ભારત અને ન્યુઝીલેન્ડ વચ્ચે ત્રણ મેચની વનડે સીરીઝની પ્રથમ મેચ 11 જાન્યુઆરીએ રમાશે.આ મેચમાં ભારતના દિગ્ગજ બેટ્સમેન વિરાટ કોહલી અને રોહિત શર્મા પણ મેદાન પર રમતા જોવા મળશે. વિરાટ કોહલી આ મેચમાં મોટા રેકોર્ડ બનાવવાની અણી પર ઉભો છે. જો જમણા હાથના વિસ્ફોટક બેટ્સમેન કિંગ કોહલી ન્યૂઝીલેન્ડ સામેની પ્રથમ મેચમાં 25 રન બનાવી લે તો તે તેના 28000 આંતરરાષ્ટ્રીય રન પૂરા કરી લેશે. એટલું જ નહીં, આ રન સાથે વિરાટ કોહલી સચિન તેંડુલકરનો રેકોર્ડ તોડી દેશે અને સૌથી ઝડપી 28000 આંતરરાષ્ટ્રીય રન બનાવનાર બેટ્સમેન બની જશે.
વિરાટ કોહલીએ અત્યાર સુધી આંતરરાષ્ટ્રીય ક્રિકેટમાં કુલ 27975 રન બનાવ્યા છે. આ ત્રણેય ફોર્મેટના રનનો સમાવેશ કરે છે: ટેસ્ટ, ODI અને T20. કોહલીને 28000 રન પૂરા કરવા માટે માત્ર 25 રનની જરૂર છે. 25 રન બનાવ્યા બાદ વિરાટ કોહલી 28000 આંતરરાષ્ટ્રીય રન પૂરા કરનાર વિશ્વનો ત્રીજો બેટ્સમેન બની જશે. કોહલી સૌથી ઓછી ઇનિંગ્સમાં આ સિદ્ધિ હાંસલ કરનાર બેટ્સમેન બનશે.
સચિન તેંડુલકરે 644 ઇનિંગ્સમાં 28 હજાર રન પૂરા કર્યા હતા. જ્યારે કુમાર સંગાકારાએ 666 ઇનિંગ્સમાં આ રેકોર્ડ બનાવ્યો હતો. જો વિરાટ કોહલી ન્યૂઝીલેન્ડ સામેની પ્રથમ મેચમાં 25 રન બનાવી લે છે તો તે 624 ઇનિંગ્સમાં 28000 રન પુરા કરનાર બેટ્સમેન બની જશે. વિરાટ કોહલી આ દિવસોમાં શાનદાર ફોર્મમાં છે, તેથી ચાહકો અપેક્ષા રાખશે કે તે પ્રથમ મેચમાં જ આ ખાસ સિદ્ધિ હાંસલ કરશે.
દક્ષિણ આફ્રિકા સામેની છેલ્લી ODI શ્રેણીમાં તેણે 302 રન બનાવીને ‘પ્લેયર ઓફ ધ સિરીઝ’નો ખિતાબ જીત્યો હતો, જેમાં બે શાનદાર સદી સામેલ હતી. વધુમાં, સ્થાનિક ક્રિકેટમાં વિજય હજારે ટ્રોફીમાં દિલ્હી તરફથી રમતી વખતે, તેણે આંધ્રપ્રદેશ સામે 131 રનની વિસ્ફોટક સદી ફટકારી હતી અને ગુજરાત સામે પણ 77 રન બનાવ્યા હતા. વિરાટ કોહલી આ દિવસોમાં જોરદાર લયમાં જોવા મળી રહ્યો છે. તેણે 6 જાન્યુઆરીએ દિલ્હી સામે રમાનારી વિજય હજારે ટ્રોફી માટે પણ ટીમ સાથે જોડાવાનો નિર્ણય કર્યો છે. તેણે આ સિઝનમાં વિજય હજારે ટ્રોફીની બે મેચ રમી છે, જેમાં તેણે એક સદી અને એક શાનદાર અડધી સદી ફટકારી છે.
