ભારત અને સાઉથ આફ્રિકા વચ્ચે 30 નવેમ્બરથી રાંચીમાં ત્રણ મેચની વનડે સિરીઝ શરૂ થઈ રહી છે. નિયમિત કેપ્ટન શુભમન ગિલ ઈજાના કારણે આ શ્રેણીનો ભાગ નથી. કેએલ રાહુલ ટીમની કમાન સંભાળશે. અનુભવી બેટ્સમેન વિરાટ કોહલી અને રોહિત શર્મા ફરી એકવાર ભારતનું પ્રતિનિધિત્વ કરવા મેદાનમાં ઉતરશે. આ પહેલા ઓસ્ટ્રેલિયા સામેની વનડે સીરીઝની છેલ્લી મેચમાં આ જોડીએ ધૂમ મચાવી હતી અને ટીમને મજબૂત જીત અપાવી હતી. ટીમ ઈન્ડિયાના સ્ટાર બેટ્સમેન વિરાટ કોહલીનો આફ્રિકા વિરૂદ્ધ રેકોર્ડ શાનદાર રહ્યો છે અને તે રાંચીમાં યોજાનારી ODIમાં પોતાનો રેકોર્ડ સુધારવા ઈચ્છશે.
ટેસ્ટ શ્રેણીમાં કારમી હાર બાદ, ભારતીય ટીમ અનુભવી ખેલાડીઓ, ખાસ કરીને વિરાટ કોહલી અને રોહિત શર્માની વનડે ફોર્મેટમાં વાપસી કરીને તાકાત મેળવવા માંગે છે. વનડે ક્રિકેટમાં દક્ષિણ આફ્રિકા સામે વિરાટ કોહલીનો રેકોર્ડ હંમેશાથી ઘણો પ્રભાવશાળી રહ્યો છે. કોહલીએ દક્ષિણ આફ્રિકા સામે 31 મેચમાં 65.39ની એવરેજથી 1504 રન બનાવ્યા છે. આ સમયગાળા દરમિયાન તેણે પાંચ સદી અને આઠ અડધી સદી ફટકારી છે.
ભારત અને દક્ષિણ આફ્રિકા વચ્ચે પ્રથમ વનડે રાંચીમાં રમાશે. આ મેદાન પર વિરાટ કોહલીનું પ્રદર્શન શાનદાર રહ્યું છે. વિરાટ કોહલીએ 5 મેચમાં 192ની એવરેજથી 384 રન બનાવ્યા છે.આ દરમિયાન તેણે બે સદી અને એક અડધી સદી ફટકારી છે. તેણે 2014માં રાંચીમાં શ્રીલંકા સામે 139 રનની ઈનિંગ રમી હતી. તેની એવરેજ સ્પષ્ટ સંકેત આપે છે કે આ મેદાન પર કોહલીને રોકવા માટે દક્ષિણ આફ્રિકાના બોલરોએ કેટલીક ખાસ રણનીતિ બનાવવી પડશે. કોહલી પાસે આ સિરીઝમાં વધુ એક મોટો વર્લ્ડ રેકોર્ડ બનાવવાની તક છે. તે દ્વિપક્ષીય વનડે શ્રેણીમાં 10,000 રન પૂરા કરનાર વિશ્વનો પ્રથમ ખેલાડી બનવાથી માત્ર 64 રન દૂર છે.
