જ્યારે એક પત્રકારે પુતિનની સામે તેની ગર્લફ્રેન્ડને પ્રપોઝ કર્યું તો રશિયન રાષ્ટ્રપતિએ શું કહ્યું?

રશિયન વ્લાદિમીર પુતિનની વર્ષની છેલ્લી પ્રેસ કોન્ફરન્સ દરમિયાન શુક્રવારે એક રસપ્રદ ઘટના જોવા મળી હતી. પુતિનના આ ઈન્ટરવ્યુમાં ઘણા ગંભીર સવાલો પૂછવામાં આવ્યા હતા અને ભારે હંગામો થયો હતો. આ પ્રેસ કોન્ફરન્સનું સમગ્ર રશિયામાં ટીવી પર જીવંત પ્રસારણ કરવામાં આવી રહ્યું હતું. ત્યારે એક પત્રકારે બધાનું ધ્યાન ખેંચ્યું. આ રશિયન પત્રકારને તક મળતા જ તેણે પુતિનની સામે તેની ગર્લફ્રેન્ડને પ્રપોઝ કર્યું. તેણે રશિયન રાષ્ટ્રપતિને લગ્નમાં આમંત્રણ પણ આપ્યું હતું.

સ્થાનિક પત્રકાર કિરીલ બઝાનોવ પ્રેસ કોન્ફરન્સમાં લાલ બો ટાઈ પહેરીને આવ્યા હતા અને પોસ્ટર લઈને આવ્યા હતા જેમાં લખ્યું હતું કે “હું લગ્ન કરવા માંગુ છું.” પુતિનની નજર તેના પર પડતાં જ તેણે ખચકાટ વગર માઇક્રોફોનમાં કહેવાનું શરૂ કર્યું, “રાષ્ટ્રપતિ, શુભ બપોર. હું કિરીલ બાઝાનોવ છું. યેકાટેરિનબર્ગ પ્રાદેશિક ટીવીમાંથી.” આના પર પુતિને તેને રોક્યો અને કહ્યું, “અરે, તમે સંપૂર્ણ પોશાક પહેરેલા દેખાશો. જાણે કે તમે રજિસ્ટ્રી ઓફિસમાં જઈને લગ્ન કરવાના છો.”

હોલમાં તાળીઓનો ગડગડાટ થયો

આના પર બાઝાનોવે કહ્યું, “હા.… મને ખબર છે કે મારી ગર્લફ્રેન્ડ અત્યારે પ્રેસ કોન્ફરન્સ જોઈ રહી છે. ઓલેચકા, મારી સાથે લગ્ન કર!” પત્રકારોથી ભરેલા શ્રોતાઓએ આને ખૂબ વધાવી લીધું. અને લગભગ એક કલાક પછી, યજમાનોએ પુતિનને રોક્યા અને સારા સમાચાર આપ્યા કે ઓલેચકાએ હા કહી હતી. હોલમાં ફરી તાળીઓનો ગડગડાટ થયો.