ટીમ ઈન્ડિયાની સ્ટાર ઓપનિંગ બેટ્સમેન સ્મૃતિ મંધાનાએ ઈંગ્લેન્ડ સામેની નજીકની હાર માટે પોતાને જવાબદાર ગણાવી છે. મંધાનાનું કહેવું છે કે તે ખોટા શોટ સિલેક્શનને કારણે આઉટ થઈ ગઈ અને ભારતીય બેટિંગનું પતન તેની વિકેટથી શરૂ થયું. તમને જણાવી દઈએ કે, ICC મહિલા ક્રિકેટ વર્લ્ડ કપ 2025ની 20મી મેચમાં ભારતને ઈંગ્લેન્ડના હાથે માત્ર 4 રનથી હારનો સામનો કરવો પડ્યો હતો. પ્રથમ બેટિંગ કરતા ઈંગ્લેન્ડે હીથર નાઈટની સદીની મદદથી 288 રન બનાવ્યા હતા. જ્યારે મંધાના આઉટ થઈ ત્યારે ભારતને 52 બોલમાં માત્ર 55 રનની જરૂર હતી, જો તે થોડો સમય ક્રિઝ પર ઊભી રહી હોત તો ભારત આસાનીથી મેચ જીતી શક્યું હોત.
સ્મૃતિ મંધાનાએ મેચ પછીની પ્રેસ કોન્ફરન્સમાં કહ્યું, “હા, ચોક્કસ. મારો મતલબ છે કે અમે તૂટી પડ્યા, અને બધાએ તે જોયું. મને લાગે છે કે તે સમયે અમારું શોટ સિલેક્શન વધુ સારું થઈ શક્યું હોત. ખાસ કરીને કારણ કે તે મારી સાથે શરૂ થયું હતું, હું તેની જવાબદારી લઉં છું; મારા શોટની પસંદગી વધુ બુદ્ધિશાળી હોવી જોઈએ. અમારે માત્ર એક ઓવરમાં છ રનની જરૂર હતી, અને અમે રમતને આગળ વધારવાનો પ્રયત્ન કરીશું. હું જાતે કરીશ કારણ કે આ પતન મારાથી શરૂ થયું છે.”
ઈંગ્લેન્ડ સામેની આ હાર બાદ ભારતનો સેમીફાઈનલમાં જવાનો રસ્તો મુશ્કેલ બની ગયો છે. ટીમ ઈન્ડિયાની આગામી મેચ 23 ઓક્ટોબરે ન્યૂઝીલેન્ડ સામે છે, જે વર્ચ્યુઅલ ક્વાર્ટર ફાઈનલ હશે. જે ટીમ આ મેચ જીતશે તેની સેમિફાઇનલમાં પહોંચવાની વધુ તકો હશે.
INDW vs ENGW મેચ કેવી રહી?
ટોસ જીતીને પ્રથમ બેટિંગ કરવા ઉતરેલી ઈંગ્લેન્ડની ટીમે હીથર નાઈટ (109)ની સદીના આધારે નિર્ધારિત 50 ઓવરમાં 8 વિકેટના નુકસાન પર 288 રન બનાવ્યા હતા. નાઈટ ઉપરાંત એમી જોન્સે શાનદાર અડધી સદી ફટકારી હતી. એક સમય એવો હતો જ્યારે એવું લાગતું હતું કે ઈંગ્લેન્ડ સરળતાથી 300 રનનો આંકડો પાર કરી જશે, પરંતુ ભારતીય બોલરોએ અંતે શાનદાર વાપસી કરીને ઈંગ્લિશ ટીમને થોડા ઓછા સ્કોર સુધી રોકી દીધી હતી. આ દરમિયાન દીપ્તિ શર્માએ 4 વિકેટ ઝડપી હતી.
