હાઈકોર્ટે હવે કર્ણાટક સરકારના રાષ્ટ્રીય સ્વયંસેવક સંઘ (RSS)ના કાર્યક્રમો પર પ્રતિબંધ મૂકવાના આદેશ પર સ્ટે મૂકી દીધો છે. જસ્ટિસ એમ નાગપ્રસન્નાની આગેવાની હેઠળની બેંચે રાજ્ય સરકાર અને હુબલી પોલીસ કમિશનરના આદેશ પર વચગાળાનો સ્ટે મૂકી દીધો છે અને પૂછ્યું છે કે તેમને આ માટે બંધારણીય અધિકાર કેવી રીતે મળ્યો. 18 ઓક્ટોબરે રાજ્ય સરકારે કહ્યું હતું કે પરવાનગી વિના 10 થી વધુ લોકો ભેગા થવું એ ગુનો છે. આ ઉપરાંત પાર્ક, રસ્તા અને રમતના મેદાનમાં વધુ લોકો ભેગા થશે તો કાર્યવાહી કરવામાં આવશે.
સરકાર બંધારણીય અધિકારોને પ્રતિબંધિત કરી શકે નહીં: HC
હાઈકોર્ટે કહ્યું કે સરકાર બંધારણની કલમ 19(1)(A), 19(1)(B) હેઠળ આપવામાં આવેલા અધિકારોને પ્રતિબંધિત કરી શકે નહીં. કોર્ટે કહ્યું કે દરેકને અભિવ્યક્તિનો અધિકાર અને શાંતિપૂર્ણ રીતે ભેગા થવાનો અધિકાર આપવામાં આવ્યો છે અને સરકાર તેમાં દખલ ન કરી શકે. આ મામલે હજુ વધુ સુનાવણી થવાની છે. હાલમાં કોર્ટના આ આદેશથી આરએસએસને વચગાળાની રાહત મળી છે.
બીજેપી સાંસદ તેજસ્વી સૂર્યાએ કહ્યું હતું કે આરએસએસ વિરુદ્ધ આ તમામ પગલાં પ્રિયંક ખડગેના ઈશારે લેવામાં આવી રહ્યા છે. તેમણે કહ્યું, આરએસએસ શાંતિપૂર્ણ રીતે તેની પ્રવૃત્તિઓ કરે છે. તે શાંતિપૂર્વક સરઘસ પણ કાઢે છે. તે જ સમયે, કર્ણાટકની કેબિનેટે આરએસએસના કાર્યક્રમો અને શાખાઓ પર પ્રતિબંધ મૂકવાના આદેશને મંજૂરી આપી હતી. મંજૂરી વગર સરકારી સ્થળોએ એકત્ર થવું એ ગુનો ગણાશે અને તેની સામે કાર્યવાહી કરવામાં આવશે તેમ જણાવાયું હતું.
આ પહેલા પ્રિયંક ખડગેએ મુખ્યમંત્રી સિદ્ધારમૈયાને પત્ર લખીને કહ્યું હતું કે રાજ્યમાં આરએસએસની ગતિવિધિઓને રોકવાની જરૂર છે. ભાજપે કહ્યું હતું કે કોંગ્રેસ આ બધું માત્ર રાજકીય બદલાની ભાવનાથી કરવા માંગે છે. આ પછી કોંગ્રેસે પ્રતિક્રિયા આપતા કહ્યું હતું કે 2013માં ભાજપ સરકારે પણ આવો જ આદેશ આપ્યો હતો અને કહ્યું હતું કે શાળાના પરિસર અને રમતના મેદાનનો ઉપયોગ માત્ર શૈક્ષણિક કાર્યક્રમો માટે કરવામાં આવશે.
