ગુરુવારે ભારતીય શેરબજારનો ઉછાળો અટકી ગયો. બ્રેન્ટ ક્રૂડના ભાવમાં વધારો, ડોનાલ્ડ ટ્રમ્પનું કડક નિવેદન, લેબેનોન પર ઈઝરાયેલના હુમલા અને વિદેશી રોકાણકારો દ્વારા સતત વેચવાલીથી સેન્સેક્સ અને નિફ્ટી આજે લાલ નિશાનમાં કારોબાર કરી રહ્યા છે.
બેન્કિંગ શેરમાં દબાણ વધ્યું
ખાનગી બેન્કિંગ શેરોમાં નબળાઈએ ઘટાડાને વધુ ઊંડો બનાવ્યો હતો. HDFC બેન્ક લિમિટેડ અને ICICI બેન્કે મળીને સેન્સેક્સમાં લગભગ 250 પોઈન્ટનો ઘટાડો કર્યો હતો.
નિષ્ણાતો કહે છે કે વિદેશી પોર્ટફોલિયો રોકાણકારો (FPIs) દ્વારા સતત વેચાણ પણ બજાર માટે ચિંતાનો વિષય છે. 8 એપ્રિલના રોજ તેજીના દિવસે પણ FPIs એ રૂ. 2,811.97 કરોડનું ચોખ્ખું વેચાણ કર્યું હતું.
ટ્રમ્પના નિવેદનથી અનિશ્ચિતતા વધી છે
ટ્રમ્પે પોતાના સોશિયલ મીડિયા પ્લેટફોર્મ પર કહ્યું કે ઈરાનની આસપાસ અમેરિકી સૈન્ય તૈનાત ચાલુ રહેશે. તેમણે ચેતવણી આપી હતી કે જો ‘વાસ્તવિક સમજૂતી’ લાગુ કરવામાં નહીં આવે તો સ્થિતિ વધુ વણસી શકે છે. આ નિવેદને યુએસ-ઈરાન તણાવના પહેલાથી જ ચાલી રહેલા ભયને વધુ વધાર્યો, જેણે બજારના સેન્ટિમેન્ટ પર સીધી અસર કરી.
લેબનોન અને ક્રૂડ કનેક્શન
જિયોજિત ઈન્વેસ્ટમેન્ટ્સના ચીફ સ્ટ્રેટેજિસ્ટ વીકે વિજયકુમારના જણાવ્યા અનુસાર, લેબનોનમાં વધતા તણાવની અસર ક્રૂડ ઓઈલની કિંમતો પર પડી શકે છે. જો ક્રૂડ ફરી વધે તો બજારની તાજેતરની રેલી નબળી પડી શકે છે. જૂન ડિલિવરી માટે બ્રેન્ટ ક્રૂડ તેના પાછલા બંધ કરતાં 2.86% વધુ, $97.47 પ્રતિ બેરલ પર પહોંચી ગયું છે.
