અમેરિકી રાષ્ટ્રપતિ ડોનાલ્ડ ટ્રમ્પે ગાઝા અને ઈઝરાયેલ વચ્ચે શાંતિ મંત્રણાના બીજા તબક્કા માટે શાંતિ બોર્ડની રચના કરવાની જાહેરાત કરી છે. પાકિસ્તાને દાવો કર્યો છે કે વડા પ્રધાન શહેબાઝ શરીફને પણ આ બોર્ડમાં સામેલ થવા માટે આમંત્રણ આપવામાં આવ્યું છે. વ્હાઇટ હાઉસે શુક્રવારે જ એક યાદી બહાર પાડી હતી જેમાં આ બોર્ડમાં સામેલ થવા માટે સંભવિત સભ્યોના નામ હતા.
પાકિસ્તાનના વિદેશ મંત્રી તાહિર અંદરબીએ કહ્યું કે પાકિસ્તાનને અમેરિકા તરફથી ઔપચારિક આમંત્રણ મળ્યું છે. તેમણે કહ્યું કે આંતરરાષ્ટ્રીય સ્તરે શાંતિ અને સુરક્ષાના પ્રયાસોમાં પાકિસ્તાન હંમેશા મદદરૂપ રહેશે. યુએનના ઠરાવ મુજબ ગાઝામાં કાયમી શાંતિ માટે તમામ પ્રયાસો કરવામાં આવશે.
વ્હાઇટ હાઉસે કહ્યું હતું કે અનુભવ, વિકાસ, માળખાકીય વિકાસ અને આર્થિક વ્યૂહરચનાના આધારે સભ્યોને આ શાંતિ બોર્ડમાં સામેલ કરવામાં આવશે. તુર્કિયે સહિત લગભગ 60 દેશોને તેમાં ભાગ લેવા માટે આમંત્રણ આપવામાં આવ્યું છે. તેમાં ઇજિપ્ત, આર્જેન્ટિના, ઇન્ડોનેશિયા, ઇટાલી, મોરોક્કો, યુકે, જર્મની, કેનેડા અને ઓસ્ટ્રેલિયાનો સમાવેશ થાય છે. યુએસ સેક્રેટરી ઓફ સ્ટેટ માર્કો રોબિયો, યુકેના ભૂતપૂર્વ વડા પ્રધાન ટોની બ્લેર, વિશ્વ બેંકના પ્રમુખ અજય બંગા અને ડોનાલ્ડ ટ્રમ્પના વરિષ્ઠ વાટાઘાટકારો જેરેડ કુશનર અને સ્ટીવ વિટકોફ પણ પેનલનો ભાગ હશે.
ઇઝરાયેલ નો પીસ બોર્ડ અંગે નારાજગી વ્યક્ત કરી
ઈઝરાયેલ અમેરિકાના આ પીસ બોર્ડથી ખુશ નથી. ઈઝરાયેલના વડાપ્રધાન બેન્જામિન નેતન્યાહુએ કહ્યું કે પીસ બોર્ડ બનાવતા પહેલા તેમની પાસેથી કોઈ અભિપ્રાય લેવામાં આવ્યો નથી. તેમણે કહ્યું કે ગાઝામાં એક્ઝિક્યુટિવ બોર્ડ દ્વારા જે પણ જાહેરાત કરવામાં આવી છે તે ઈઝરાયેલની નીતિઓની વિરુદ્ધ છે. આવી સ્થિતિમાં ટૂંક સમયમાં અમેરિકન અધિકારીઓ સાથે વાતચીત કરવામાં આવશે. ડોનાલ્ડ ટ્રમ્પ આ પીસ બોર્ડના અધ્યક્ષ બનવા જઈ રહ્યા છે. રિપોર્ટ અનુસાર ટ્રમ્પે ઘણા વૈશ્વિક નેતાઓને બોર્ડના સભ્ય બનવા માટે આમંત્રણ આપ્યું છે.
