પશ્ચિમ એશિયામાં ચાલી રહેલ યુદ્ધ મોટા પાયે ફેલાઈ રહ્યું છે. અમેરિકા અને ઈઝરાયેલ ઈરાન પર સતત હુમલા કરી રહ્યા છે ત્યારે ઈરાન ખાડી દેશોને નિશાન બનાવીને જવાબી કાર્યવાહી કરી રહ્યું છે. આ બધાની વચ્ચે યુક્રેનને પણ ઈરાન તરફથી ધમકી આપવામાં આવી છે. તહેરાને કહ્યું છે કે ડ્રોન ટેક્નોલોજીથી યુદ્ધમાં અમેરિકા અને ઈઝરાયલની મદદ કર્યા બાદ યુક્રેન હવે ઈરાન માટે કાયદેસરનું નિશાન બની ગયું છે. તેના પર સીધો હુમલો પણ કરી શકે છે.
ઈરાનની રાષ્ટ્રીય સુરક્ષા અને વિદેશ નીતિ સંસદીય સમિતિના વડા ઈબ્રાહિમ અઝીઝીના જણાવ્યા અનુસાર, યુક્રેન દ્વારા અમેરિકા અને ઈઝરાયેલની તરફેણમાં ઈરાન વિરોધી ગતિવિધિઓમાં સામેલ થવાના કારણે આ સ્થિતિ સર્જાઈ છે. “ઇઝરાયલી શાસનને ડ્રોન સમર્થન આપીને, યુક્રેન અસરકારક રીતે આ યુદ્ધમાં જોડાયું છે. યુએન ચાર્ટરની કલમ 51 હેઠળ, યુક્રેને હવે તેના સમગ્ર ક્ષેત્રને ઈરાન માટે કાયદેસરના લક્ષ્યમાં ફેરવી દીધું છે,” અઝીઝીએ સોશિયલ મીડિયા પર લખ્યું. ઈરાનનો આરોપ છે કે યુક્રેન ઈઝરાયલ અને પશ્ચિમી દેશોને ઈરાન વિરુદ્ધ મજબૂત કરવા માટે તેની ડ્રોન કુશળતાનો ઉપયોગ કરી રહ્યું છે.
યુક્રેનના વિદેશ મંત્રાલયે આ ધમકીને ‘હાસ્યાસ્પદ’ ગણાવીને ફગાવી દીધી છે. શુક્રવારે યુક્રેનના રાષ્ટ્રપતિ વોલોદિમિર ઝેલેન્સકીએ દાવો કર્યો હતો કે 10 થી વધુ દેશોએ કિવ પાસે ઈરાની ડ્રોન સાથે કામ કરવા માટે મદદ માંગી છે ત્યારે સ્થિતિ વધુ તંગ બની ગઈ હતી. ઝેલેન્સ્કી માને છે કે રશિયા સાથેના યુદ્ધ દરમિયાન ઈરાની ડ્રોન તોડી પાડવાનો યુક્રેનનો અનુભવ આજે વિશ્વ માટે અત્યંત મહત્ત્વનો છે.
