ગુજરાત ટાઇટન્સના ખેલાડી રોબિન મિન્ઝનો બાઇક અકસ્માત થયો છે. હાલમાં તે ઝારખંડ ટીમનો વિકેટકીપર બેટ્સમેન છે. રોબિન મિન્ઝ રાંચીમાં બાઇક અકસ્માતમાં ઘાયલ થયા હતા. તેને જમણા ઘૂંટણમાં થોડી ઈજા થઈ છે. રોબિનને IPL2024ની મિની ઓક્શનમાં ગુજરાત ટાઇટન્સે રૂ. 3.6 કરોડમાં ખરીદ્યો હતો. IPLની કોઈપણ ટીમમાં પસંદગી પામેલ તે પ્રથમ આદિવાસી ખેલાડી છે.
રોબિન મિન્ઝના પિતા ફ્રાન્સિસ મિન્ઝે અકસ્માતની પુષ્ટિ કરતા કહ્યું કે રોબિનનું બાઇક અન્ય બાઇક સાથે અથડાયું હતું. રોબિનને સામાન્ય ઈજા થઈ છે. તે ડોક્ટરોની દેખરેખ હેઠળ છે. મિન્ઝ સુપર બાઇક પર રાંચીમાં ક્યાંક જઈ રહ્યો હતો, ત્યારે તેની બાઇક બીજી બાઇક સાથે અથડાઈ. જે બાદ રોબિને કાબૂ ગુમાવ્યો અને પડી ગયો. રોબીનની બાઇકનો આગળનો ભાગ સંપૂર્ણપણે ક્ષતિગ્રસ્ત થયો હતો. રોબિનને તેના જમણા ઘૂંટણમાં ઈજા થઈ છે.
ડોમેસ્ટિક ક્રિકેટમાં શાનદાર પ્રદર્શન કર્યું હતું
તમને જણાવી દઈએ કે રોબિન છેલ્લા 2 વર્ષથી ઘરેલુ ક્રિકેટમાં શાનદાર પ્રદર્શન કરી રહ્યો છે. મિંજ તેની આક્રમક બેટિંગ માટે જાણીતો છે. તે રાંચીમાં સોનેટ ક્લબ તરફથી રમે છે. તે પૂર્વ રણજી ક્રિકેટર એસપી ગૌતમ અને આસિફ પાસેથી ક્રિકેટની યુક્તિઓ શીખી રહ્યો છે. રોબિને હજુ સુધી રણજીમાં પદાર્પણ કર્યું નથી. તે છતાં, IPL 2024 માટે ગયા વર્ષે ડિસેમ્બરમાં યોજાયેલી મિની હરાજીમાં તેને સામેલ કરવા માટે IPL ટીમો વચ્ચે સ્પર્ધા હતી.
ગુજરાતે તેને કરોડોમાં ખરીદ્યો હતો
તેને ગુજરાત ટાઇટન્સે 3.6 કરોડ રૂપિયામાં ખરીદ્યો હતો. મુંબઈ ઈન્ડિયન્સ, લખનૌ સુપરજાયન્ટ્સ, દિલ્હી કેપિટલ્સ અને કોલકાતા નાઈટ રાઈડર્સે પણ તેના માટે બોલી લગાવી હતી. રોબિન ઝારખંડ તરફથી અંડર-19 અને અંડર-25માં રમી ચૂક્યો છે. ઇંગ્લેન્ડ સામે ચોથી ટેસ્ટ માટે ગયેલી ભારતીય ટીમનો ભાગ રહેલા શુભમન ગિલ રાંચી એરપોર્ટ પર રોબિન મિંચના પિતા ફ્રાન્સિસ ઝેવિયર મિંચને મળ્યો હતો. મિંજના પિતા ભૂતપૂર્વ સૈનિક છે અને રાંચી એરપોર્ટ સિક્યોરિટીમાં પોસ્ટેડ છે. ગિલ ગુજરાત ટાઇટન્સના કેપ્ટન છે.