મુંબઈ/નવી દિલ્હી: રિઝર્વ બેંક ઓફ ઈન્ડિયા (RBI) એ ચાલુ નાણાકીય વર્ષ 2023-24 માટે ગ્રોસ ડોમેસ્ટિક પ્રોડક્ટ (GDP) વૃદ્ધિનું અનુમાન 6.5 ટકા પર જાળવી રાખ્યું છે. અગાઉ એપ્રિલમાં આરબીઆઈએ ચાલુ નાણાકીય વર્ષ માટે જીડીપી વૃદ્ધિનું અનુમાન 6.4 ટકાથી વધારીને 6.5 ટકા કર્યું હતું.
આરબીઆઈના ગવર્નર શક્તિકાંત દાસે ગુરુવારે મોનેટરી પોલિસી કમિટી (એમપીસી)ની ત્રણ દિવસીય સમીક્ષા બેઠક બાદ આ જાહેરાત કરી હતી. બીજી દ્વિમાસિક MPC સમીક્ષા બેઠક વિશે માહિતી આપતા, શક્તિકાંત દાસે જણાવ્યું હતું કે સ્થાનિક માંગની સ્થિતિ વૃદ્ધિને સમર્થન આપે છે. આ સાથે ગ્રામીણ વિસ્તારોમાં માંગ પણ પાછી પાટા પર આવી રહી છે. તેમણે કહ્યું કે નાણાકીય વર્ષ 2022-23માં રવિ પાકનું સારું ઉત્પાદન, સામાન્ય ચોમાસું અને સેવાઓમાં સતત તેજીએ ખાનગી વપરાશને વેગ આપ્યો છે. આવી સ્થિતિમાં, ચાલુ નાણાકીય વર્ષ દરમિયાન એકંદર આર્થિક પ્રવૃત્તિઓને ટેકો મળવો જોઈએ.
આ અઠવાડિયે, વિશ્વ બેંકે નાણાકીય વર્ષ 2023-24 માટે ભારતનો આર્થિક વિકાસ દર 6.3 ટકા રહેવાનું અનુમાન કર્યું છે. અગાઉ, ફિચ રેટિંગ્સે પણ ચાલુ નાણાકીય વર્ષ માટે ભારતની જીડીપી વૃદ્ધિ 6 ટકા રહેવાનું અનુમાન કર્યું હતું. નેશનલ સ્ટેટેસ્ટિક્સ ઓફિસ (NSO) દ્વારા ગયા સપ્તાહે જાહેર કરાયેલા આંકડા અનુસાર, નાણાકીય વર્ષ 2022-23માં ભારતનો આર્થિક વિકાસ દર 7.2 ટકા રહ્યો છે, જ્યારે અગાઉના નાણાકીય વર્ષ 2021-22માં આ દર 9.1 ટકા હતો.