ઇઝરાયેલ અને હમાસ વચ્ચે ચાલી રહેલા યુદ્ધનો આજે 32મો દિવસ છે. 7 ઓક્ટોબરે હમાસ દ્વારા કરવામાં આવેલા હુમલા બાદ ગાઝા પટ્ટીમાં ઈઝરાયેલના હવાઈ અને જમીની હુમલાઓ ચાલુ છે અને આતંકવાદીઓને નિશાન બનાવવામાં આવી રહ્યા છે. દરમિયાન ઈઝરાયેલ ડિફેન્સ ફોર્સે એક વીડિયો જાહેર કર્યો છે અને દાવો કર્યો છે કે હમાસના લડવૈયાઓ રોકેટ લોન્ચ સેન્ટર તરીકે સ્કૂલ અને મસ્જિદનો ઉપયોગ કરી રહ્યા છે. ઈઝરાયેલી સેના દ્વારા વીડિયો જાહેર કરવામાં આવ્યો છે જેમાં બતાવવામાં આવ્યું છે કે ઈઝરાયેલનો એક સૈનિક એક સ્કૂલની ઈમારત બતાવી રહ્યો છે. દિવાલો પર બાળકોના ચિત્રો છે. ઈઝરાયેલના સૈનિકે જણાવ્યું કે હમાસના લડવૈયાઓ ઈઝરાયેલ પર હુમલો કરવા માટે આ સ્કૂલનો ઉપયોગ કરી રહ્યા હતા.
મીડિયા રિપોર્ટ્સ અનુસાર, ઇઝરાયેલી સેનાએ ગત રાત્રે હમાસ શાસિત ગાઝાના ઉત્તરીય ભાગને દક્ષિણ ભાગથી અલગ કરીને ઝડપી હવાઈ હુમલા કર્યા હતા. દરમિયાન, એક મહિના સુધી ચાલેલા યુદ્ધમાં માર્યા ગયેલા પેલેસ્ટિનિયનોની કુલ સંખ્યા 10 હજારને વટાવી ગઈ છે.
ટુકડીઓ ટૂંક સમયમાં ગાઝા શહેરમાં પ્રવેશી શકે છે
પેલેસ્ટિનિયનોએ એક દિવસ અગાઉ દક્ષિણ ગાઝામાં હુમલામાં માર્યા ગયેલા ડઝનેક લોકો માટે સામૂહિક અંતિમ સંસ્કાર કર્યા હતા. દરમિયાન, ઇઝરાયેલી મીડિયાએ જણાવ્યું હતું કે ટુકડીઓ ટૂંક સમયમાં ગાઝા શહેરમાં પ્રવેશી શકે છે અને શહેરી વિસ્તારોમાં લડાઈ ફાટી નીકળતાં મૃત્યુઆંક વધવાની ધારણા છે. જે અહેવાલો આવ્યા છે તે મુજબ ઈઝરાયેલમાં 1,400 થી વધુ લોકોના મોત થયા છે.આમાંથી મોટાભાગના લોકો 7 ઓક્ટોબરે હમાસ દ્વારા કરવામાં આવેલા પ્રારંભિક હુમલામાં મૃત્યુ પામ્યા હતા, ત્યારબાદ આ યુદ્ધ શરૂ થયું હતું જે 32માં દિવસે પણ ચાલુ છે. ઈઝરાયેલની સેનાના પ્રવક્તા લેફ્ટનન્ટ કર્નલ રિચર્ડ હેચટે પોતાના નિવેદનમાં કહ્યું છે કે અમે તેમની નજીક જઈ રહ્યા છીએ. અમે ઘેરાબંધી પૂર્ણ કરી છે અને હમાસના ગઢ ગણાતા ગાઝાને ઉત્તર અને દક્ષિણમાં વિભાજિત કર્યા છે.