નવી દિલ્હી : દેશમાં સ્થાનિક પેસેન્જર વાહનોના જથ્થાબંધ વેચાણમાં એપ્રિલમાં વાર્ષિક ધોરણે 13 ટકાનો વધારો થયો છે. પેસેન્જર વાહનોનું જથ્થાબંધ વેચાણ એપ્રિલમાં 3,31,278 યુનિટ હતું જે એપ્રિલ 2022માં 2,93,303 યુનિટ હતું.
સોસાયટી ઓફ ઈન્ડિયન ઓટોમોબાઈલ મેન્યુફેક્ચરર્સ (SIAM) એ શુક્રવારે જાહેર કરેલા ડેટામાં જણાવ્યું હતું કે સ્થાનિક પેસેન્જર વાહનોના જથ્થાબંધ વેચાણમાં એપ્રિલમાં વાર્ષિક ધોરણે 13 ટકાનો વધારો થયો છે. ઉદ્યોગ મંડળે જણાવ્યું હતું કે આ સમયગાળા દરમિયાન તમામ સેગમેન્ટમાં માંગ મજબૂત રહી હતી. ડેટા અનુસાર, પેસેન્જર વાહનોનું જથ્થાબંધ વેચાણ એપ્રિલમાં 3,31,278 યુનિટ હતું, જે એપ્રિલ 2022માં 2,93,303 યુનિટ હતું.
માહિતી અનુસાર, મારુતિ સુઝુકી ઈન્ડિયા લિમિટેડે આ સમયગાળા દરમિયાન ડીલરોને 1,37,320 વાહનો મોકલ્યા હતા, જે ગયા વર્ષના સમાન સમયગાળામાં 1,21,995 એકમો હતા. એ જ રીતે, હ્યુન્ડાઈ મોટર ઈન્ડિયાના જથ્થાબંધ વાહનોનું વેચાણ એપ્રિલમાં 49,701 યુનિટ હતું જે એક વર્ષ અગાઉના સમાન સમયગાળામાં 44,001 યુનિટ હતું.
SIAM એ જણાવ્યું હતું કે ટુ-વ્હીલરનું જથ્થાબંધ વેચાણ પણ એપ્રિલમાં 15 ટકા વધીને 13,38,588 યુનિટ થયું હતું જે એક વર્ષ અગાઉ 11,62,582 યુનિટ હતું. એ જ રીતે થ્રી-વ્હીલરનું જથ્થાબંધ વેચાણ પણ એપ્રિલમાં વધીને 42,885 યુનિટ થયું હતું. હોલસેલ એટલે કંપનીઓ તરફથી ડીલરોને પહોંચાડવામાં આવતા પેસેન્જર વાહનોની સંખ્યા.
ઉદ્યોગ મંડળના પ્રમુખ વિનોદ અગ્રવાલે જણાવ્યું હતું કે સારા ચોમાસાના વરસાદથી આગામી સમયમાં વાહનોના વેચાણમાં વૃદ્ધિને ટકાવી રાખવામાં મદદ મળી શકે છે. સિયામના મહાનિર્દેશક રાજેશ મેનને જણાવ્યું હતું કે એપ્રિલ મહિનામાં પેસેન્જર વાહનોનું વેચાણ કોઈપણ વર્ષના એપ્રિલમાં અત્યાર સુધીનું સૌથી વધુ રહ્યું છે.