એશિયા કપ; ભારત-પાક ક્રિકેટ મેચ અનિર્ણિત રહી, હાર્દિક-કિશન બેટિંગમાં છાપ છોડી!
નવી દિલ્હી: શ્રીલંકાના પલ્લેકેલે ઈન્ટરનેશનલ ક્રિકેટ સ્ટેડિયમમાં શનિવારે ભારત-પાકિસ્તાન એશિયા કપ ગ્રુપ A મેચમાં વરસાદે બગાડ કર્યો હતો. જો આ મેચ પર વરસાદની અસર જોવા ન મળી હોત તો તે રોમાંચક મેચમાં ફેરવાઈ શકે તેમ હતું. કારણ કે જ્યારે ભારત અને પાકિસ્તાનની ક્રિકેટ ટીમો આમને-સામને હોય છે ત્યારે આખી દુનિયાની નજર મેચ પર હોય છે. પ્રથમ દાવમાં બેટિંગ કરતા ભારતની શરૂઆત સારી રહી ન હતી. ભારતની પ્રથમ 3 વિકેટ એક પછી એક ઝડપી પડી હતી.
જે બાદ બેટિંગ કરવા આવેલા ઇશાન કિશન અને હાર્દિક પંડ્યાએ ભારતની ઇનિંગ્સને સંભાળી હતી અને 5મી વિકેટ માટે 138 રનની ઐતિહાસિક ભાગીદારી કરી હતી. જેમાંથી હાર્દિક પદ્યાએ 87 અને ઈશાન કિશને 82 રન બનાવ્યા હતા. જેના કારણે ભારતે 48.5 ઓવરમાં તેની તમામ 10 વિકેટ ગુમાવીને કુલ 266 રન બનાવ્યા હતા. અને પાકિસ્તાનને 267 રનનો ટાર્ગેટ આપ્યો હતો.
જો કે જે બાદ વરસાદનું વિકરાળ સ્વરૂપ જોવા મળ્યું હતું. જેના કારણે પાકિસ્તાની ઇનિંગ્સનો એક પણ બોલ વાગી શક્યો ન હતો. બાદમાં, લગભગ 10.05 વાગ્યે, અમ્પાયરોએ મેચ રદ કરવાની જાહેરાત કરી. પાકિસ્તાન તરફથી શાહીન આફ્રિદી સૌથી સફળ બોલર હતો, જેણે 10 ઓવરમાં 35 રનમાં 4 ભારતીય બેટ્સમેનોને પેવેલિયન મોકલી દીધા હતા. આ સાથે જ નસીમ શાહે 8.5 ઓવરમાં 38 રનમાં 3 ભારતીય બેટ્સમેનોને આઉટ કર્યા હતા. આ સિવાય હરિસ રઉફે પણ 9 ઓવરમાં 58 રન આપીને 3 વિકેટ ઝડપી હતી.