નવી દિલ્હી, લોકસભા ચૂંટણી પહેલા વિરોધ પક્ષો સામે કેન્દ્રીય એજન્સીઓની કાર્યવાહી ચાલુ છે. મુખ્ય વિપક્ષી પાર્ટી કોંગ્રેસના બેંક ખાતાઓ ફ્રીઝ કર્યા બાદ હવે આવકવેરા વિભાગે 1823 કરોડ રૂપિયાની રિકવરી નોટિસ મોકલી છે.
મીડિયા રિપોર્ટ્સ અનુસાર, દિલ્હી હાઈકોર્ટે ટેક્સ નોટિસને પડકારતી પાર્ટીની અરજીને ફગાવી દીધાના એક દિવસ બાદ કોંગ્રેસને આ નોટિસ મોકલવામાં આવી છે. નવીનતમ સૂચના આકારણી વર્ષ 2017-18 થી 2020-21 માટે છે, તેમાં દંડ અને વ્યાજ બંનેનો સમાવેશ થાય છે.
આવકવેરા વિભાગની નોટિસ પર કોંગ્રેસના કોષાધ્યક્ષ અજય માકનની પ્રતિક્રિયા સામે આવી છે. તેમણે કહ્યું કે, આવકવેરા વિભાગે અત્યાર સુધી કોંગ્રેસને 1823 કરોડ રૂપિયાની ડિમાન્ડ નોટિસ જારી કરી છે. જેમાં 1993-94માં સીતારામ કેસરીના કાર્યકાળ સંબંધિત રૂ. 53.5 કરોડની માંગનો સમાવેશ થાય છે. અમે માગણી કરીએ છીએ કે આવકવેરા વિભાગ ભાજપ વિરુદ્ધ રૂ. 4600 કરોડની ટેક્સ ડિમાન્ડ નોટિસ જારી કરે.
અજય માકને વધુમાં કહ્યું કે, એવા સમયે જ્યારે લોકસભાની ચૂંટણીની તારીખો જાહેર થઈ ગઈ છે, ત્યારે આઈટી વિભાગ કોંગ્રેસ પર ખોટી રીતે દંડ લગાવી રહ્યું છે અને પૈસાની માંગણી કરી રહ્યું છે. આ બાબતો સ્પષ્ટપણે દર્શાવે છે કે આઇટી વિભાગને ભાજપની ખામીઓ દેખાતી નથી. તેથી અમારી માંગ છે કે IT વિભાગ દ્વારા ભાજપને 4,600 કરોડ રૂપિયાની નોટિસ આપવામાં આવે.
માકને વધુમાં કહ્યું, ‘આવકવેરા વિભાગ અને ચૂંટણી પંચ ભાજપની ખામીઓ તરફ આંખ આડા કાન કરી રહ્યા છે, તેઓ માત્ર કોંગ્રેસને જ જુએ છે. ભાજપે IT વિભાગના નિયમોનું જે રીતે ઉલ્લંઘન કર્યું તેની સમીક્ષા દર્શાવે છે કે ભાજપને સાત વર્ષમાં 4,600 કરોડ રૂપિયાના દંડનો સામનો કરવો પડ્યો છે. પરંતુ… તેમની અવગણના કરીને, ‘ભાજપના આઈટી વિભાગ’એ કોંગ્રેસ પાસેથી 1,823 કરોડ રૂપિયાની માંગણી કરતી 5 વર્ષની નોટિસ મોકલી છે.
આવકવેરા સત્તાવાળાઓએ રૂ. 200 કરોડનો દંડ લાદ્યા અને તેના ભંડોળને સ્થગિત કર્યા પછી કોંગ્રેસ પહેલેથી જ ભંડોળની અછતનો સામનો કરી રહી છે. કોંગ્રેસના નેતાઓએ પહેલેથી જ કહ્યું હતું કે ચૂંટણી પહેલા અમને લેવલ પ્લેઇંગ ફિલ્ડ નથી મળી રહ્યું. અમારા તમામ ફંડ બંધ કરી દેવામાં આવ્યા છે પરિણામે અમે અમારા કર્મચારીઓને ચૂકવણી કરવામાં અસમર્થ છીએ અને નેતાઓ ફ્લાઇટ ટિકિટ મેળવી શકતા નથી.