રોગચાળાના તળિયેથી ભારતીય શેરબજારે તેના સાથીદારોને પાછળ રાખી દીધા છે. એક અભ્યાસ દર્શાવે છે કે ભારતીય ઈક્વિટી માર્કેટે ચીન જેવા હરીફ બજારો કરતાં લગભગ છ ગણું વધારે વળતર આપ્યું છે. બેન્ચમાર્ક નિફ્ટીએ માર્ચ 2020ના નીચલા સ્તરથી 137 ટકા વળતર આપ્યું છે. તેની સરખામણીમાં ચીનના શાંઘાઈ કમ્પોઝિટ ઈન્ડેક્સે માત્ર 21 ટકાનું વળતર દર્શાવ્યું છે. જ્યારે હોંગકોંગના હેંગસેંગમાં 11 ટકાનો ઘટાડો જોવા મળી રહ્યો છે. વૈશ્વિક સ્તરે, બ્રાઝિલના બેન્ચમાર્ક સિવાય કોઈ પણ સૂચકાંક ટ્રિપલ-અંકનું વળતર બતાવી શક્યું નથી.
આશ્ચર્યજનક રીતે, ભારતીય બજારમાં મિડ-કેપ અને સ્મોલ-કેપ સેગમેન્ટ્સે લાર્જ-કેપ્સ કરતાં વધુ પ્રદર્શન કર્યું છે અને 200 ટકાથી વધુ વળતર આપી રહ્યા છે. નિફ્ટી મિડ-કેપ 100 ઇન્ડેક્સે કોવિડ યુગના નીચા સ્તરથી લગભગ સાડા ત્રણ વર્ષના ગાળામાં જબરદસ્ત 226 ટકાનો વધારો નોંધાવ્યો છે. તે 24 માર્ચ, 2022 ના રોજ 10,750 ની નીચી સપાટી સામે બુધવારે 38,832 ની ઊંચી સપાટીએ પહોંચ્યો હતો. એ જ રીતે, નિફ્ટી સ્મોલ-કેપ 100 ઇન્ડેક્સે પણ 24 માર્ચ, 2020 ના રોજ 3,203 ની ઊંચી સપાટીથી 212 ટકા વળતર નોંધાવ્યું છે. બુધવારે ઇન્ડેક્સ લગભગ એક ટકા વધીને 11,981.25 પર ટ્રેડ કરી રહ્યો હતો. વર્તમાન કેલેન્ડરમાં, નિફ્ટી સ્મોલ-કેપ 100 ઇન્ડેક્સ અને નિફ્ટી મિડ-કેપ 100 ઇન્ડેક્સ બંનેએ 23 ટકાનું વળતર દર્શાવ્યું છે. જ્યારે નિફ્ટી મિડકેપ ઈન્ડેક્સે છેલ્લા બે વર્ષમાં 44 ટકાનું વળતર દર્શાવ્યું છે. સ્મોલ-કેપ ઇન્ડેક્સમાં બે વર્ષમાં 24 ટકાનું વળતર જોવા મળ્યું છે.
વૈશ્વિક સ્તરે, બ્રાઝિલને ભારત કરતાં કોવિડ પછીનું ઊંચું વળતર ધરાવતું એકમાત્ર ઊભરતું બજાર તરીકે જોવામાં આવે છે. ત્યાંના બેન્ચમાર્ક બોવેસ્પાએ 108 ટકા વળતર આપ્યું છે. તેની પાછળ રશિયા-યુક્રેન યુદ્ધ પછી કોમોડિટીના ભાવમાં વધારો છે. અન્યથા, અન્ય કોઈ ઊભરતાં બજારે ઊંચું વળતર દર્શાવ્યું નથી. જ્યારે યુરોપ અને યુએસ બેન્ચમાર્કે યોગ્ય વળતર આપ્યું છે. ઉદાહરણ તરીકે, ડાઉ જોન્સે 104 ટકાનું મજબૂત વળતર આપ્યું છે, જ્યારે જર્મનીના DAXએ 97 ટકા અને ફ્રાન્સના CECએ 87 ટકા વળતર આપ્યું છે. ઊભરતાં બજારોમાં, તાઇવાનના ઇન્ડેક્સે બ્રાઝિલ પછી 97 ટકા સાથે ત્રીજા ક્રમનું સૌથી વધુ વળતર દર્શાવ્યું હતું. જોકે, કોરિયા અને સિંગાપોરના બજારો અનુક્રમે 74 ટકા અને 68 ટકાના વળતર સાથે ઘણા પાછળ છે. જ્યારે ચીનનો બેન્ચમાર્ક માત્ર 21 ટકાનું વળતર દર્શાવે છે. જ્યારે હોંગકોંગનો હેંગસેંગ 11 ટકાના ઘટાડાનો સંકેત આપી રહ્યો છે.