મુંબઈઃ ચાલુ નાણાકીય વર્ષના પ્રથમ નવ મહિનામાં ભારતની સ્ટીલની આયાત વધીને પાંચ વર્ષની ઊંચી સપાટીએ પહોંચી છે. પ્રારંભિક સરકારી ડેટા દર્શાવે છે કે સ્ટીલની આયાત વધવાથી ભારત ફિનિશ્ડ સ્ટીલનો ચોખ્ખો આયાતકાર બની રહ્યો છે. આર્થિક પ્રવૃતિઓ અને માળખાકીય વિકાસમાં વધારો થવાને કારણે દેશમાં સ્થાનિક અને આયાતી સ્ટીલની માંગ વધી રહી છે.
ભારતથી વિપરીત યુરોપ અને યુએસમાં સ્ટીલની માંગ ધીમી પડી રહી છે. ભારતે એપ્રિલ-ડિસેમ્બરના સમયગાળા દરમિયાન કુલ 5.6 લાખ ટન ફિનિશ્ડ સ્ટીલની આયાત કરી હતી, જે ગયા વર્ષના સમાન સમયગાળા કરતાં 26.40 ટકા વધુ છે.
આ સમયગાળા દરમિયાન, દેશમાં સ્ટીલનો વપરાશ પણ વાર્ષિક ધોરણે 14.80 ટકા વધીને 100 મિલિયન ટનની છ વર્ષની ઊંચી સપાટીએ પહોંચ્યો હતો, જે ભારતમાં સ્ટીલની ઊંચી માંગ દર્શાવે છે.
આગામી નાણાકીય વર્ષમાં દેશની આર્થિક વૃદ્ધિ વૈશ્વિક વૃદ્ધિ કરતાં વધી જવાની ધારણા હોવાથી સ્ટીલની માંગ મજબૂત રહેવાની ધારણા છે.
ભારતીય સ્ટીલ મિલોએ સરકાર પાસે વધતી આયાત સામે રક્ષણ પૂરું પાડવાની માંગ કરી છે. જો કે, સ્થાનિક માંગમાં વધારાને જોતા સરકારે આ માંગ સ્વીકારવાનું ટાળ્યું છે.
એપ્રિલ-ડિસેમ્બરના સમયગાળા દરમિયાન ભારતની સ્ટીલની આયાતમાં દક્ષિણ કોરિયાની આયાતનો સૌથી મોટો હિસ્સો હતો. દક્ષિણ કોરિયાથી 17.70 લાખ ટનની આયાત કરવામાં આવી હતી.