નવી દિલ્હી: ચાલુ નાણાકીય વર્ષ (2023-2024)ના પ્રથમ 10 મહિના એટલે કે એપ્રિલ-જાન્યુઆરી દરમિયાન, ભારતમાં દેશનો વીજળીનો વપરાશ વાર્ષિક ધોરણે 7.5 ટકા વધીને 1,354.97 અબજ યુનિટ થયો છે. જે સમગ્ર દેશમાં આર્થિક વિકાસનો સંકેત આપે છે.
સરકારી ડેટા અનુસાર, દેશમાં વીજળીનો વપરાશ ચાલુ નાણાકીય વર્ષના એપ્રિલ-જાન્યુઆરી સમયગાળામાં વધીને 1354.97 અબજ યુનિટ થયો છે, જે નાણાકીય વર્ષ 2022-23ના એપ્રિલ-જાન્યુઆરીના સમયગાળામાં 1259.49 અબજ યુનિટ હતો.
સમગ્ર નાણાકીય વર્ષ 2022-23માં તે 1505.91 અબજ યુનિટ હતું. નિષ્ણાતો માને છે કે દેશમાં વીજળીના વપરાશમાં 7.5 ટકાની વૃદ્ધિ આ નાણાકીય વર્ષના પ્રથમ 10 મહિનામાં આર્થિક પ્રવૃત્તિમાં થયેલા વધારાને સ્પષ્ટપણે દર્શાવે છે.
તહેવારોની મોસમ પહેલા ઔદ્યોગિક પ્રવૃત્તિઓને કારણે ઓગસ્ટ, સપ્ટેમ્બર અને ઓક્ટોબરમાં વીજળીના વપરાશમાં તીવ્ર વધારો થયો છે. નિષ્ણાંતોનું કહેવું છે કે આર્થિક ગતિવિધિઓમાં સુધારો અને કોલ્ડ વેવની સ્થિતિમાં ફેબ્રુઆરીમાં વીજળીનો વપરાશ વધતો રહેશે.
જાન્યુઆરીમાં જાહેર કરાયેલા તેના પ્રથમ એડવાન્સ અંદાજમાં નેશનલ સ્ટેટિસ્ટિક્સ ઓફિસે જણાવ્યું હતું કે દેશનો આર્થિક વિકાસ 2023-24માં 7.3 ટકા રહેશે. ડેટા દર્શાવે છે કે જાન્યુઆરીમાં વીજળીનો વપરાશ 126.30 અબજ યુનિટથી 5.4 ટકા વધીને 133.18 અબજ યુનિટ થયો છે.
જાન્યુઆરીમાં, એક દિવસમાં વીજળીની મહત્તમ માંગ વધીને 222.32 GW થઈ ગઈ. જાન્યુઆરી 2023માં મહત્તમ વીજ પુરવઠો 210.72 GW અને જાન્યુઆરી 2022માં 192.18 GW હતો.