નવી દિલ્હી :સ્ટીલ ઉત્પાદક કંપની ટાટા સ્ટીલ ચાલુ નાણાકીય વર્ષ 2023-24માં રૂ. 16,000 કરોડના રોકાણની યોજના બનાવી રહી છે. આ રોકાણ સ્થાનિક અને વૈશ્વિક વેપારના વિસ્તરણ માટે કરવામાં આવશે. ટાટા સ્ટીલના સીઈઓ અને એમડી ટીવી નરેન્દ્રને જણાવ્યું હતું કે આમાંથી રૂ. 10,000 કરોડ માત્ર ટાટા સ્ટીલના બિઝનેસ વિસ્તરણ પર ખર્ચવામાં આવશે. કંપનીની ભારતીય પેટાકંપની પર બે હજાર કરોડ રૂપિયાનો ખર્ચ કરવામાં આવશે. નરેન્દ્રને કહ્યું કે આ રોકાણની રકમ આંતરિક સ્ત્રોતોમાંથી ઉભી કરવામાં આવશે. તેમણે કહ્યું કે ટાટા સ્ટીલમાં 10,000 કરોડ રૂપિયાના રોકાણમાંથી લગભગ 70 ટકા ઓડિશાના કલિંગનગર પ્લાન્ટ પર ખર્ચવામાં આવશે. કંપની આ પ્લાન્ટની ઉત્પાદન ક્ષમતા વાર્ષિક 3 મિલિયન ટનથી વધારીને 8 મિલિયન ટન કરી રહી છે. તેમણે કહ્યું કે આ સિવાય અન્ય પ્રોજેક્ટના વિસ્તરણનું કામ પણ ચાલી રહ્યું છે. નેધરલેન્ડ પ્લાન્ટની ક્ષમતા વિસ્તરણમાં રૂ. 1,100 કરોડનું રોકાણ કરવામાં આવશે. નાણાકીય વર્ષ 2022-23માં ટાટા સ્ટીલે બિઝનેસ વિસ્તરણ પર 12 હજાર કરોડ રૂપિયા ખર્ચ્યા છે.
પતંજલિ ફૂડ્સ 1500 કરોડનો ખર્ચ કરશે
યોગ ગુરુ બાબા રામદેવની કંપની પતંજલિ ફૂડ્સ આગામી પાંચ વર્ષમાં બિઝનેસ વિસ્તરણ પર રૂ. 1,500 કરોડ ખર્ચ કરશે. આમાંથી મોટા ભાગનો ખર્ચ પામ ઓઈલના બિઝનેસમાં થશે. પતંજલિ ફૂડ્સના સીઈઓ સંજીવ અસ્થાનાએ કહ્યું કે કંપનીએ આગામી પાંચ વર્ષમાં બિઝનેસ વધારીને રૂ. 45-50 હજાર કરોડ કરવાનો લક્ષ્યાંક રાખ્યો છે. આ માટે કંપની ઉત્પાદનોનું વિસ્તરણ કરી રહી છે. તેમણે કહ્યું કે અમારી પાસે ક્ષમતા અને મૂડી પહેલેથી જ છે.