મુંબઈ વૈશ્વિક મંદી છતાં દેશમાં ઓફિસ સ્પેસની માંગ આવતા વર્ષે વધવાની ધારણા છે. વર્ષ 2024માં ઓફિસ ડિમાન્ડમાં 20 થી 22 ટકાનો વધારો થઈ શકે છે. આ વર્ષે ઓફિસ ડિમાન્ડ ગયા વર્ષની સમાન હોઈ શકે છે અને 2017-19 દરમિયાન સરેરાશ માંગ કરતાં પણ વધી શકે છે. આ વર્ષે ઓફિસની માંગ વધીને 370 થી 390 લાખ ચોરસ ફૂટ થવાની ધારણા છે. એક પ્રોપર્ટી એડવાઇઝરી ફર્મના રિપોર્ટ અનુસાર, આ વર્ષે જાન્યુઆરી-સપ્ટેમ્બરના સમયગાળામાં ઓફિસ સ્પેસની માંગ 260 લાખ ચોરસ ફૂટ નોંધાઈ હતી, જે ગયા વર્ષની કુલ માંગના 68 ટકા છે. વર્ષના અંત સુધીમાં માંગ વધીને 370 થી 390 લાખ ચોરસ ફૂટ થઈ શકે છે કારણ કે આ વર્ષના છેલ્લા ક્વાર્ટરમાં ઓફિસ લીઝિંગ પ્રવૃત્તિઓમાં વધારો થયો છે. દેશના 7 મોટા ઓફિસ માર્કેટમાં ઓફિસ સ્પેસ આ વર્ષના અંત સુધીમાં વધીને 80 કરોડ ચોરસ ફૂટ થઈ શકે છે. હાલમાં આ આંકડો 79.28 કરોડ ચોરસ ફૂટ છે. ઓફિસ ડિમાન્ડ આવતા વર્ષે વધુ વેગ પકડી શકે છે કારણ કે દેશમાં ઓફિસ ડિમાન્ડના ફંડામેન્ટલ્સ ખૂબ મજબૂત છે અને દેશમાં વૈશ્વિક તણાવની નોંધપાત્ર અસર દેખાતી નથી. રિપોર્ટ અનુસાર વર્ષ 2024માં ઓફિસ સ્પેસની માંગ 450 થી 470 લાખ સ્ક્વેર ફીટ રહી શકે છે. વર્ષ 2023ની સરખામણીમાં તેમાં 20 થી 22 ટકાનો વધારો થવાની ધારણા છે કારણ કે હવે ઓફિસમાં આવવા અને હાઇબ્રિડ મોડલ સાથે કામ કરવાને પ્રથમ પ્રાથમિકતા આપવામાં આવી રહી છે.