પાકિસ્તાનમાં ગુરુવારે સામાન્ય ચૂંટણી પહેલા અશાંત બલૂચિસ્તાન પ્રાંતમાં બે વિસ્ફોટોમાં ઓછામાં ઓછા 25 લોકો માર્યા ગયા હતા. જ્યારે બ્લાસ્ટમાં 42થી વધુ લોકો ઘાયલ થયા છે.
પહેલો બ્લાસ્ટ બલૂચિસ્તાનના પિશિનમાં થયો હતો
પ્રથમ ઘટનામાં, પિશિન જિલ્લામાં અપક્ષ ઉમેદવાર અસફંદ્યાર ખાન કાકરના કાર્યાલયની બહાર થયેલા પ્રચંડ વિસ્ફોટમાં 17 લોકો માર્યા ગયા હતા અને 30 અન્ય ઘાયલ થયા હતા, જીઓ ન્યૂઝે અહેવાલ આપ્યો હતો. એક કલાક કરતાં ઓછા સમય પછી, કિલા અબ્દુલ્લા વિસ્તારમાં જમીયત ઉલેમા ઇસ્લામ (JUI) ના ચૂંટણી કાર્યાલયની બહાર બીજો બોમ્બ વિસ્ફોટ થયો, જેમાં આઠ લોકો માર્યા ગયા અને 12 અન્ય ઘાયલ થયા. કિલા અબ્દુલ્લા વિસ્તારમાં JUI ઉમેદવારના ચૂંટણી કાર્યાલયમાં વિસ્ફોટથી ભારે નુકસાન થયું છે.
બેગમાં બોમ્બ રાખવામાં આવ્યો હતો જેમાં ‘ટાઈમર’ હતું
બલૂચિસ્તાનના પંજગુરના વરિષ્ઠ પોલીસ અધિકારી અબ્દુલ્લા ઝાહરીએ જણાવ્યું હતું કે ઉમેદવાર અસફંદ્યાર ખાન કાકરના ચૂંટણી કાર્યાલયની બહાર ‘ટાઈમર’ સાથે જોડાયેલ બેગમાં બોમ્બ મૂકવામાં આવ્યો હતો. કેટલાક ઘાયલોની હાલત ગંભીર છે અને તેમને સારવાર માટે ક્વેટા લઈ જવામાં આવ્યા છે, એમ તેમણે જણાવ્યું હતું. તેમણે કહ્યું કે વિસ્ફોટમાં મૃતકોની સંખ્યા વધી શકે છે.
મૃત્યુઆંક વધી શકે છે
કહેવામાં આવી રહ્યું છે કે બલૂચિસ્તાનમાં થયેલા વિસ્ફોટમાં મૃતકોની સંખ્યા વધી શકે છે. હોસ્પિટલના એમએસ ડૉક્ટર હબીબે જિયો ન્યૂઝને જણાવ્યું કે ઘાયલ લોકોને તહેસીલ હોસ્પિટલ ખાનોજાઈમાં રિફર કરવામાં આવ્યા છે. ડો.હબીબે જણાવ્યું કે મોટાભાગના ઘાયલોની હાલત ગંભીર છે.
હોસ્પિટલોમાં ઈમરજન્સી લાદવામાં આવી
પ્રાંતીય સ્વાસ્થ્ય સચિવે જણાવ્યું કે વિસ્ફોટ બાદ ક્વેટાની તમામ હોસ્પિટલોમાં ઈમરજન્સી લાદી દેવામાં આવી છે. ઘાયલોની સારવાર માટે વધારાના સ્ટાફને બોલાવવામાં આવ્યો છે. ટ્રોમા સેન્ટર, સિવિલ હોસ્પિટલ, BMC, બેનઝીર અને શેખ જાયદ હોસ્પિટલને પણ એલર્ટ મોડ પર રાખવામાં આવી છે.
બ્લાસ્ટ બાદ સુરક્ષા વધારી દેવામાં આવી છે
અબ્દુલ્લા ઝહરીએ કહ્યું કે લોકોને મતદાન મથકો પર જતા રોકવા માટે આતંકવાદીઓ ઉમેદવારોને નિશાન બનાવી રહ્યા છે, પરંતુ ચૂંટણી સમયસર થાય તે સુનિશ્ચિત કરવા માટે સુરક્ષાકર્મીઓની સંખ્યા વધારવામાં આવી રહી છે. પાકિસ્તાનના ચૂંટણી પંચે (ECP) બે વિસ્ફોટોની પુષ્ટિ કરી અને કહ્યું કે ચૂંટણી માટે પ્રાંતમાં સુરક્ષા વધારી દેવામાં આવી છે. ECPના પ્રવક્તાએ કહ્યું કે, આ આતંકવાદી હુમલાના ગુનેગારોને પકડી લેવામાં આવશે અને તેમની સામે કડક કાર્યવાહી કરવામાં આવશે.
બલૂચિસ્તાનના ગૃહમંત્રીએ હુમલાની નિંદા કરી છે
બલૂચિસ્તાનના ગૃહ પ્રધાન જાન અચકઝાઈએ હુમલાની નિંદા કરી અને કહ્યું કે ચૂંટણી નિર્ધારિત સમય મુજબ જ થશે. કાર્યવાહક ગૃહ પ્રધાન ગૌહર એજાઝે પિશિનમાં અપક્ષ ઉમેદવારના ચૂંટણી કાર્યાલયની બહાર થયેલા વિસ્ફોટની સખત નિંદા કરી છે.
પાકિસ્તાનમાં ચૂંટણી પહેલા બલૂચિસ્તાનમાં હિંસા ચરમસીમાએ છે
પાકિસ્તાનમાં 8 ફેબ્રુઆરીએ યોજાનારી સામાન્ય ચૂંટણી પહેલા અફઘાનિસ્તાન અને ઈરાનની સરહદે આવેલા બલૂચિસ્તાનમાં હિંસા ચરમસીમા પર છે. મંગળવારે પ્રાંતના વિવિધ વિસ્તારોમાં સુરક્ષા ચોકીઓ, ચૂંટણી પ્રચાર કાર્યાલયો અને રેલીઓ પર 10 ગ્રેનેડ હુમલા કરવામાં આવ્યા હતા. રવિવારથી, પ્રાંતમાં આવા 50 જેટલા હુમલાઓ થયા છે અને સિબી શહેરમાં એક ઘટનામાં, હુમલાખોરોએ નેશનલ એસેમ્બલી માટે પાકિસ્તાન તહરીક-એ-ઈન્સાફના ઉમેદવારની ચૂંટણી રેલીને નિશાન બનાવી હતી, જેમાં ચાર લોકો માર્યા ગયા હતા અને છ અન્ય ઘાયલ થયા હતા.