ઈસ્લામાબાદ. પાકિસ્તાને અમેરિકા સાથે નવા સુરક્ષા કરાર પર હસ્તાક્ષર કર્યા છે. એક્સપ્રેસ ટ્રિબ્યુને તેના અહેવાલમાં આ દાવો કર્યો છે. આ સાથે બંને દેશો વચ્ચે લાંબા સમયથી ચાલી રહેલા તણાવ બાદ નવા સંરક્ષણ સહયોગની શરૂઆત થઈ શકે છે. સાથે જ પાકિસ્તાન માટે અમેરિકા પાસેથી નવા હથિયાર મેળવવાનો રસ્તો પણ સાફ થઈ જશે.
શાહબાઝ કેબિનેટે કોમ્યુનિકેશન ઇન્ટર-ઓપરેબિલિટી અને સિક્યુરિટી મેમોરેન્ડમ ઓફ એગ્રીમેન્ટને મંજૂરી આપી છે. આ કરારને લઈને હજુ સુધી કોઈપણ દેશ દ્વારા કોઈ સત્તાવાર જાહેરાત કરવામાં આવી નથી. થોડા દિવસો પહેલા પાકિસ્તાનના આર્મી ચીફ જનરલ અસીમ મુનીર સેન્ટ્રલ કમાન્ડના ચીફ જનરલ માઈકલ એરિક કુરિલાને મળ્યા હતા. ત્યારબાદ બંને વચ્ચે દ્વિપક્ષીય સાથે સંરક્ષણ સ્તરે સહયોગ વધારવા માટે સમજૂતી થઈ હતી.
પાકિસ્તાન અને અમેરિકા વચ્ચે આ કરાર 18 વર્ષ પહેલા ઓક્ટોબર 2005માં થયો હતો જે 2020માં સમાપ્ત થયો હતો. હવે બંને દેશોએ ફરીથી તેના પર હસ્તાક્ષર કર્યા છે. આ કારણે પાકિસ્તાન અને અમેરિકા વચ્ચે સંયુક્ત સૈન્ય અભ્યાસ, તાલીમ, હથિયારોની ડીલ જેવી ઘણી બાબતો ફરી શરૂ થઈ શકે છે. પાકિસ્તાની સેના અમેરિકન કંપનીઓના હથિયારોનો ઉપયોગ કરે છે. ટ્રિબ્યુન એક્સપ્રેસના અહેવાલ મુજબ, હવે આ સમજૂતી બાદ અમેરિકા ફરીથી પાકિસ્તાનને હથિયારોની સપ્લાય શરૂ કરી શકે છે.