નવી દિલ્હી: પેટ્રોલ અને ડીઝલની સ્થાનિક કિંમતોમાં ઘટાડો થવાની સંભાવના છે. તેનું મુખ્ય કારણ એ છે કે આંતરરાષ્ટ્રીય બજારોમાં કાચા તેલની કિંમત બેરલ દીઠ 80 ડોલરની નીચે જળવાઈ રહી છે. જેના કારણે દેશની સરકારી કંપનીઓ તેલના વેચાણ પર મોટો નફો કમાઈ રહી છે.
સરકારી તેલ કંપની ઈન્ડિયન ઓઈલ કોર્પોરેશન (IOC) એ નવ મહિનામાં એટલે કે નાણાકીય વર્ષ 2023-24ના ત્રણ ક્વાર્ટરમાં 34,781.15 કરોડ રૂપિયાનો રેકોર્ડ નફો કર્યો છે.
દેશની પેટ્રોલિયમ માર્કેટિંગ કંપનીઓ પેટ્રોલ પર 11 રૂપિયા પ્રતિ લીટર અને ડીઝલ પર 6 રૂપિયા પ્રતિ લીટરનો નફો કમાઈ રહી છે. હવે જોવાનું એ રહે છે કે શું ઓઈલ કંપનીઓ પેટ્રોલ અને ડીઝલના ભાવમાં સંપૂર્ણ ઘટાડો કરે છે કે પછી છૂટક કિંમતો બદલવાની તેમની જૂની નીતિ પર પાછા ફરે છે. 7 એપ્રિલ 2022 પછી સરકારી તેલ કંપનીઓએ પેટ્રોલ અને ડીઝલના ભાવમાં ઘટાડો કર્યો નથી. 2022ની શરૂઆતમાં, યુક્રેન-રશિયા યુદ્ધને પગલે આંતરરાષ્ટ્રીય બજારમાં ક્રૂડ ઓઈલના ભાવ મોટાભાગે અસ્થિર રહ્યા હતા. જુલાઈ 2022માં ક્રૂડ ઓઈલની કિંમત પ્રતિ બેરલ $114 થઈ ગઈ હતી. જો કે તે પછી ક્રૂડ ઓઈલની કિંમતો સતત ઘટી રહી છે.
વર્તમાન નાણાકીય વર્ષની વાત કરીએ તો સપ્ટેમ્બર 2023માં ભારતે બેરલ દીઠ $93.54ની સૌથી વધુ કિંમત ચૂકવી હતી. જ્યારે બેરલ દીઠ ચૂકવેલ સૌથી નીચો ભાવ $77.42 હતો. ચાલુ નાણાકીય વર્ષમાં જાન્યુઆરી 2024 સુધી સરેરાશ $78.19 પ્રતિ બેરલ ચૂકવવામાં આવ્યા છે. તેની અસર IOCના પરિણામો પર સ્પષ્ટ દેખાઈ રહી છે.