કોર્ટે પશ્ચિમ બંગાળની મમતા બેનર્જી સરકારના વધુ એક નિર્ણય પર રોક લગાવી છે. દેશની સર્વોચ્ચ અદાલતે પશ્ચિમ બંગાળની તૃણમૂલ કોંગ્રેસ સરકારના નિર્ણય પર સ્ટે મૂક્યો છે, જેમાં ‘ધ કેરળ સ્ટોરી’ ફિલ્મના સ્ક્રિનિંગ પર પ્રતિબંધ મૂકવામાં આવ્યો હતો. આ સાથે જ બંગાળના સિનેમા ઘરોમાં ‘ધ કેરળ સ્ટોરી’ના પ્રદર્શનનો રસ્તો સાફ થઈ ગયો છે. હવે બંગાળના ફિલ્મ પ્રેમીઓ પણ આ ફિલ્મ જોઈ શકશે.
તમિલનાડુ સરકારે કહ્યું- ‘ધ કેરળ સ્ટોરી’ પર પ્રતિબંધ નહીં
સુપ્રીમ કોર્ટે ગુરુવારે આ નિર્ણય આપ્યો હતો. ‘ધ કેરળ સ્ટોરી’ સંબંધિત અરજીઓ પર સુનાવણી દરમિયાન તમિલનાડુ સરકાર સર્વોચ્ચ અદાલત જણાવ્યું કે રાજ્યમાં આ ફિલ્મ પર કોઈ પ્રતિબંધ નથી. તમિલનાડુ સરકારના વકીલે કોર્ટને કહ્યું કે ફિલ્મના સ્ક્રીનિંગ પર પ્રત્યક્ષ કે પરોક્ષ રીતે કોઈ પ્રતિબંધ લાદવામાં આવ્યો નથી.
સુપ્રીમ કોર્ટે કહ્યું: સિનેમા હોલને પૂરતી સુરક્ષા આપો
તમામ પક્ષકારોને સાંભળ્યા બાદ સુપ્રીમ કોર્ટે રાજ્ય સરકારોને નિર્દેશ આપ્યો છે કે ફિલ્મના પ્રદર્શન દરમિયાન કોઈ અડચણ ન આવે તેની ખાતરી કરે. દેશની સર્વોચ્ચ અદાલતે કહ્યું કે તમામ સિનેમા હોલને પૂરતી સુરક્ષા પૂરી પાડવામાં આવે. એટલું જ નહીં, એ પણ સુનિશ્ચિત કરવું જોઈએ કે સિનેમા જોવા જનારા સિનેપ્રેમીઓને કોઈ નુકસાન ન થાય.
8 મેના રોજ મમતા બેનર્જીએ ફિલ્મની રિલીઝ પર પ્રતિબંધ મૂક્યો હતો.
ઉલ્લેખનીય છે કે પશ્ચિમ બંગાળના મુખ્યમંત્રી મમતા બેનર્જીએ 8મી મેના રોજ રાજ્યમાં ‘ધ કેરળ સ્ટોરી’ના પ્રદર્શન પર પ્રતિબંધ ફરમાવ્યો હતો. તૃણમૂલ કોંગ્રેસના સુપ્રિમોએ કહ્યું હતું કે આ એક વિકૃત વાર્તા છે. આ ફિલ્મ નફરત ફેલાવવા જઈ રહી છે. જો આ ફિલ્મ પ્રદર્શિત થશે તો લોકોમાં વિસંવાદિતા ફેલાઈ જશે. બંગાળને હિંસાથી બચાવવા માટે તે આ ફિલ્મ પર પ્રતિબંધ લગાવી રહી છે.
તૃણમૂલ સુપ્રીમોએ પણ ભાજપ પર પ્રહારો કર્યા હતા
મમતા બેનર્જીએ કહ્યું હતું કે ‘ધ કેરળ સ્ટોરી’ એક એજન્ડા હેઠળ રિલીઝ કરવામાં આવી છે. તેમણે કહ્યું કે આ પહેલા ‘કાશ્મીર ફાઇલ્સ’ આવી હતી. હવે આગામી દિવસોમાં ‘બેંગાલ ફાઇલ્સ’ બનાવવામાં આવશે. મમતા બેનર્જીએ કેન્દ્રમાં સત્તારૂઢ ભારતીય જનતા પાર્ટી (BJP) પર દેશમાં નફરત ફેલાવવાનો આરોપ પણ લગાવ્યો હતો.