તમે ઘણી ફિલ્મો અને વેબ સિરીઝમાં જોયું હશે કે એક વ્યક્તિ એક પછી એક ઘણા લોકોને મારી નાખે છે. આ વ્યક્તિ માનસિક રીતે પરેશાન છે અને તેના કારણે તે સિરિયલ કિલર બની જાય છે. આજે અમે આવા જ એક સિરિયલ કિલર વિશે વાત કરવાના છીએ. આ કિલર દુનિયાનો સૌથી યુવા સિરિયલ કિલર છે.
સૌથી ચોંકાવનારી વાત એ છે કે આ સીરિયલ કિલર અન્ય કોઈ દેશનો નહીં પરંતુ ભારતના બિહારનો છે. વિશ્વના સૌથી યુવા સિરિયલ કિલર અમરજીત સદાએ માત્ર 8 વર્ષની ઉંમરે ત્રણ હત્યાઓ કરી હતી.
બિહારના બેગુસરાયના મુશારી ગામમાં જન્મેલા અમરજીત સદાને દુનિયાના સૌથી યુવા સિરિયલ કિલર તરીકે ઓળખવામાં આવે છે. અમરજીત સદાનો જન્મ 1998માં થયો હતો અને પોલીસ દ્વારા 2007માં ત્રણ હત્યાના આરોપમાં ધરપકડ કરવામાં આવી હતી.
2007માં પોલીસ બાળકીની હત્યાનો ભેદ ઉકેલી રહી હતી. છોકરીના માતા-પિતાને તેમની પડોશમાં રહેતા અમરજીત સદા નામના 9 વર્ષના છોકરા પર શંકા હતી. શરૂઆતમાં તો પોલીસ પણ આ વાત માનતી ન હતી, પરંતુ જ્યારે આ વાત સામે આવી ત્યારે પોલીસ પણ ચોંકી ઉઠી હતી.
પોલીસે પુરાવા મેળવી કસ્ટડીમાં પૂછપરછ શરૂ કરી તો ચોંકાવનારી બાબતો સામે આવી. પૂછપરછ દરમિયાન અમરજીતે બાળકીની હત્યા કર્યાની કબૂલાત કરી હતી અને વધુ બે હત્યાઓ વિશે પણ જણાવ્યું હતું. થોડા સમય પહેલા તેણે તેની નાની બહેનની પણ હત્યા કરી હતી, જે તેના માતા-પિતાએ બધાથી છુપાવી રાખી હતી. જ્યારે તેણે તેની પ્રથમ હત્યા કરી ત્યારે તે 8 વર્ષનો હતો.
તમે વિચારતા જ હશો કે આટલું નાનું બાળક કોઈનો જીવ કેમ લે? તપાસ દરમિયાન મનોચિકિત્સકોની ટીમે અમરજીત સદા સાથે વાત કરી અને જાણવા મળ્યું કે તેને કંડક્ટ ડિસઓર્ડર નામની માનસિક બીમારી છે. આ રોગને કારણે તે બીજાને દુઃખ પહોંચાડવામાં આનંદ લે છે. આ કારણોસર તે નાના બાળકોને પથ્થરથી કચડીને મારી નાખતો હતો.