મે મહિનામાં સ્થાનિક હવાઈ ટ્રાફિકમાં વાર્ષિક ધોરણે 36 ટકાની વૃદ્ધિ જોવા મળી હતી. ડિરેક્ટોરેટ જનરલ ઓફ સિવિલ એવિએશન (DGCA)ના ડેટા અનુસાર, ડોમેસ્ટિક એરલાઈન્સે ગયા મહિને કુલ 1.32 પેસેન્જર્સને વહન કર્યું હતું. મહિના દર મહિનાના આધારે પણ મે મહિનામાં ટ્રાફિકમાં 2.5 ટકાનો વધારો નોંધાયો છે. એપ્રિલમાં એર ટ્રાફિકમાં 1.29 કરોડથી વધુ મુસાફરો જોવા મળ્યા હતા. કોવિડ પહેલા મે-2019માં 1.22 કરોડ મુસાફરોના ટ્રાફિક કરતાં વર્તમાન વર્ષમાં વધુ ટ્રાફિક જોવા મળ્યો હતો. માર્કેટ શેરની વાત કરીએ તો મે મહિનામાં દેશની સૌથી મોટી એરલાઈન કંપની ઈન્ડિગોનો માર્કેટ શેર 3.9 ટકા વધ્યો છે. GoFirst બંધ થવાથી કંપનીને સીધો ફાયદો થયો. GoFirst એ 2 મેથી તેની સેવા રદ કરી છે.
ઈન્ડિગોનો બજાર હિસ્સો 61.3 ટકા હતો. મે મહિનામાં તેણે 81.10 લાખ મુસાફરોને વહન કર્યા હતા. એર ઈન્ડિયા મે મહિનામાં 9.4 ટકાના હિસ્સા સાથે બીજી સૌથી મોટી સ્થાનિક એરલાઈન હતી. જેમાં 12.44 લાખ લોકોએ મુસાફરી કરી હતી. જાન્યુઆરી મહિનાથી કંપનીનો બજાર હિસ્સો સતત ઘટી રહ્યો હતો. જોકે, ગો ફર્સ્ટને કારણે મે મહિનામાં તે વધ્યો હતો અને માર્કેટ શેરમાં રિકવરી જોવા મળી હતી. વિસ્તારાનો બજાર હિસ્સો મે મહિનામાં 30 બેસિસ પોઈન્ટ વધીને 9 ટકા થયો હતો. તેમાં 11.95 લાખ મુસાફરો હતા. એર એશિયા ઈન્ડિયા 7.9 ટકા શેર સાથે ચોથા સ્થાને છે. ટાટા જૂથની એક કંપનીએ 10.41 મુસાફરોને હવાઈ સેવા પૂરી પાડી હતી.