બિઝનેસ ન્યૂઝ ડેસ્ક,વર્લ્ડ ટેલેન્ટ રેન્કિંગમાં ભારત ચાર સ્થાન નીચે આવી ગયું છે. ઇન્ટરનેશનલ ઇન્સ્ટિટ્યૂટ ફોર મેનેજમેન્ટ ડેવલપમેન્ટે આ રેન્કિંગ બહાર પાડી છે, જે મુજબ 2023માં વર્લ્ડ ટેલેન્ટ રેન્કિંગમાં ભારત વિશ્વની 64 અર્થવ્યવસ્થાઓમાં ચાર સ્થાન સરકીને 56માં સ્થાને આવી ગયું છે. 2022માં ભારત આ રેન્કિંગમાં 52મા સ્થાને હતું.
રિપોર્ટ અનુસાર ભારતમાં ઈન્ફ્રાસ્ટ્રક્ચરમાં થયેલા સુધારાની પ્રશંસા કરવામાં આવી છે. પરંતુ પ્રતિભા માટે સ્પર્ધામાં સુધારો કરવા પર ભાર મૂકવામાં આવ્યો છે. ઇન્ટરનેશનલ ઇન્સ્ટિટ્યૂટ ફોર મેનેજમેન્ટ ડેવલપમેન્ટ (IMD) એ ચપળ, ટેક સેવી અને ભવિષ્ય માટે તૈયાર હોવા બદલ ભારતના ટેલેન્ટ પૂલની પ્રશંસા કરી છે. ભારતીયો તેમની ભાષાકીય વિવિધતા અને આંતરરાષ્ટ્રીય સંપર્કને કારણે વૈશ્વિક ભૂમિકાઓ માટે સારી રીતે તૈયાર જણાય છે, એમ અહેવાલમાં જણાવાયું છે.
IMD વર્લ્ડ કોમ્પિટિટિવનેસ સેન્ટરના ડિરેક્ટર પ્રોફેસર આર્ટુરો બ્રિઝે જણાવ્યું હતું કે, ઈન્ફ્રાસ્ટ્રક્ચરમાં પર્યાપ્ત રોકાણ સાથે પ્રતિભા સ્પર્ધાત્મકતા દેશની લાંબા ગાળાની સફળતા માટે મહત્વપૂર્ણ છે. IMD વર્લ્ડ ટેલેન્ટ રેન્કિંગ જીવનની ગુણવત્તા, લઘુત્તમ પગાર, પ્રાથમિકથી માધ્યમિક શિક્ષણને ધ્યાનમાં રાખીને રિપોર્ટ તૈયાર કરે છે. ભવિષ્ય માટે પોતાને તૈયાર કરવાના મામલામાં ભારત 29મા ક્રમે છે. જો કે, રિપોર્ટમાં ભારતની શિક્ષણ પ્રણાલીને નબળી ગણાવી છે અને તેને 64માંથી 63મું સ્થાન આપવામાં આવ્યું છે. આનું કારણ શિક્ષણની અસમાન પહોંચ અને ગ્રામીણ વિસ્તારોમાં અપૂરતું રોકાણ છે.
પ્રોફેસર બ્રિઝે કહ્યું કે, સૌથી મોટો ઉપાય એજ્યુકેશનમાં રોકાણ વધારવાનો છે, જેના માટે મજબૂત રાજકીય પ્રતિબદ્ધતા જરૂરી છે. કોઈપણ દેશ દ્વારા કરવામાં આવેલ આ સૌથી મોટું રોકાણ છે. IMDએ તેના અહેવાલમાં જણાવ્યું હતું કે ભારતને સ્થાનિક સ્તરે પ્રતિભા જાળવી રાખવા માટે વ્યાપક નીતિઓની જરૂર છે, જેમાં વેતન વૃદ્ધિ અને જીવનની ગુણવત્તામાં સુધારો, સલામતી અને પર્યાવરણીય મિત્રતાનો સમાવેશ થાય છે.