સનરાઈઝર્સ હૈદરાબાદે આઈપીએલની આ સિઝનમાં પ્રથમ જીત મેળવીને પોતાનું ખાતું ખોલ્યું છે. હૈદરાબાદે મુંબઈ ઈન્ડિયન્સને 31 રને હરાવ્યું છે. ટોસ જીતીને પ્રથમ બોલિંગ કરવા આવેલા મુંબઈના બોલરો કંઈ ખાસ કરી શક્યા ન હતા. પ્રથમ બેટિંગ કરીને હૈદરાબાદે IPLના ઈતિહાસમાં સૌથી વધુ સ્કોર બનાવ્યો હતો. 278 રનનો પીછો કરવા આવેલી પંડ્યાની ટીમ 5 વિકેટ ગુમાવીને 246 રન બનાવી શકી હતી. મુંબઈ ઈન્ડિયન્સ હજુ પણ આ સિઝનમાં તેની પ્રથમ જીતની રાહ જોઈ રહ્યું છે.
આઈપીએલના ઈતિહાસમાં આ પ્રથમ વખત બન્યું છે કે બંને દાવમાં મળીને કુલ 38 સિક્સર ફટકારવામાં આવી હોય. બંને ટીમોએ શાનદાર બેટિંગ કરી અને રેકોર્ડ બનાવ્યો. આજે કુલ 523 રન બનાવ્યા હતા.
અંતમાં રોમારિયો શેફર્ડે 6 બોલમાં 15 રન બનાવ્યા હતા. મુંબઈના કેપ્ટન હાર્દિક પંડ્યાએ ધીમી ઈનિંગ રમી હતી. તે 20 બોલમાં 24 રન બનાવીને આઉટ થયો હતો. તે જયદેવ ઉનડકટના હાથે હેનરિક ક્લાસેનના હાથે કેચ આઉટ થયો હતો. આ પહેલા તિલક વર્માએ 64 રનની શાનદાર ઇનિંગ રમી હતી. નમન ધીર 14 બોલમાં 30 રન બનાવીને આઉટ થયો હતો, રોહિત શર્મા 12 બોલમાં 26 રન બનાવીને આઉટ થયો હતો અને ઈશાન કિશન 13 બોલમાં 34 રન બનાવીને આઉટ થયો હતો. કમિન્સ અને ઉનડકટે બે-બે વિકેટ લીધી છે.
હેનરિક ક્લાસેનની વિસ્ફોટક ઇનિંગ્સના કારણે હૈદરાબાદે મુંબઈ સામે પહાડ જેવો સ્કોર ખડકી દીધો હતો. સનરાઈઝર્સ હૈદરાબાદે આઈપીએલના ઈતિહાસના તમામ રેકોર્ડ તોડી નાખ્યા છે. હૈદરાબાદે RCBનો 263 રનનો રેકોર્ડ તોડ્યો છે. હૈદરાબાદે 3 વિકેટના નુકસાન પર 277 રન બનાવ્યા છે. ક્લાસને 34 બોલમાં 80 રનની ઇનિંગ રમી હતી. તેણે 4 ચોગ્ગા અને 7 છગ્ગા ફટકાર્યા હતા.
હૈદરાબાદ તરફથી અભિષેક શર્મા, ટ્રેવિસ હેડ અને હેનરિક ક્લાસને વિસ્ફોટક ઇનિંગ્સ રમી હતી. અભિષેક શર્માએ 16 બોલમાં ફિફ્ટી પૂરી કરી હતી. શર્માએ હૈદરાબાદ માટે સૌથી ઝડપી અડધી સદી ફટકારી હતી. આના અડધો કલાક પહેલા ટ્રેવિડ હેડે 18 બોલમાં અડધી સદી ફટકારીને આ રેકોર્ડ બનાવ્યો હતો. અભિષેક શર્મા 23 બોલમાં 63 રન બનાવીને આઉટ થયો હતો. તેને પીયૂષ ચાવલાએ નમન ધીરના હાથે કેચ કરાવ્યો હતો.
પોતાની ઇનિંગ દરમિયાન અભિષેકે 3 ફોર અને 7 સિક્સર ફટકારી હતી. તેની પહેલા ટ્રેવિસ હેડ 62 રન બનાવીને આઉટ થયો હતો. તેણે 24 બોલમાં 62 રન બનાવ્યા, જેમાં તેણે 9 ચોગ્ગા અને 3 છગ્ગા ફટકાર્યા. મયંક અગ્રવાલ કંઈ ખાસ કરી શક્યો નહોતો. તે 11 રન બનાવીને આઉટ થયો હતો. જ્યારે મુંબઈ ઈન્ડિયન્સ તરફથી હાર્દિક પંડ્યા, બુમરાહ અને કોએત્ઝીને 1-1 વિકેટ મળી હતી. હૈદરાબાદે માત્ર 15 ઓવરમાં 200 રનનો આંકડો પાર કરી લીધો હતો.