નવી દિલ્હી: પી-નોટ્સ દ્વારા સ્થાનિક મૂડીબજારમાં રોકાણ મેના અંતે વધીને રૂ. 1.04 લાખ કરોડ થયું છે, જે પાંચ વર્ષમાં સૌથી વધુ છે. આ રોકાણમાં ભારતની ઇક્વિટી, ડેટ અથવા બોન્ડ અને હાઇબ્રિડ સિક્યોરિટીઝમાં કરવામાં આવેલા પી-નોટ્સ રોકાણના મૂલ્યનો સમાવેશ થાય છે. સિક્યોરિટીઝ એન્ડ એક્સચેન્જ બોર્ડ ઓફ ઈન્ડિયા (સેબી) ના ડેટા દર્શાવે છે કે મે એ સતત ત્રીજો મહિનો હતો જ્યારે પી-નોટ્સ દ્વારા સ્થાનિક બજારોમાં રોકાણમાં વધારો થયો હતો. માહિતી અનુસાર મે મહિનામાં પી-નોટ્સનું રોકાણ મૂલ્ય છેલ્લા પાંચ વર્ષમાં સૌથી વધુ છે.
અગાઉ માર્ચ 2018 માં, રોકાણના આ માર્ગ દ્વારા 1.06 લાખ કરોડ રૂપિયા આવ્યા હતા. પાર્ટિસિપેટરી નોટ્સ એટલે કે P-નોટ્સ ફોરેન પોર્ટફોલિયો ઇન્વેસ્ટર્સ (FPIs) દ્વારા વિદેશી રોકાણકારોને જારી કરવામાં આવે છે જેઓ અહીં પોતાની નોંધણી કરાવ્યા વિના ભારતીય બજારોમાં રોકાણ કરવા માગે છે. જોકે આ માટે તપાસની પ્રક્રિયામાંથી પસાર થવું પડશે. માહિતી અનુસાર, ઇક્વિટી, ડેટ અને હાઇબ્રિડ સિક્યોરિટીઝમાં પી-નોટ્સ દ્વારા ભારતીય બજારોમાં કરાયેલા રોકાણનું મૂલ્ય એપ્રિલના અંતે રૂ. 95,911 કરોડની સામે મેના અંતે રૂ. 1,04,585 કરોડ હતું. આ પહેલા માર્ચ 2023માં પી-નોટ્સ દ્વારા 88,600 કરોડ રૂપિયા અને ફેબ્રુઆરીમાં 88,398 કરોડ રૂપિયાનું રોકાણ ભારતમાં આવ્યું હતું. બજાર વિશ્લેષકોએ જણાવ્યું હતું કે પી-નોટ્સ રૂટ દ્વારા રોકાણમાં વધારો અનિશ્ચિત વૈશ્વિક પરિદ્રશ્યમાં ભારતીય અર્થતંત્રની સ્થિતિસ્થાપકતાને દર્શાવે છે. આ સિવાય ચીનમાં મંદીના કારણે વિદેશી રોકાણકારો પણ ભારત તરફ આકર્ષાયા છે.