હૈદરાબાદમાં એક મોટો અકસ્માત થયો છે. આગની ઘટના ઘટી છે. અહીંના એક એપાર્ટમેન્ટમાં લાગેલી આગમાં છ લોકોના મોત થયા છે તેમજ આ મામલો નામપલ્લી વિસ્તારમાં આવેલા એક એપાર્ટમેન્ટનો છે તેવું જણાવવામાં આવ્યું છે. પોલીસના જણાવ્યા અનુસાર નામપલ્લી પોલીસ સ્ટેશન વિસ્તારમાં બજાર ઘાટ સ્થિત ચાર માળના એપાર્ટમેન્ટની નીચે સ્થિત કાર રિપેરિંગ ગેરેજમાં અચાનક આગ લાગી હતી. જ્વાળાઓ ઝડપથી આખા એપાર્ટમેન્ટમાં ફેલાઈ ગઈ અને ધુમાડાના ગોટેગોટા જોવા મળ્યા હતા. તેમાં હાજર લોકો બહાર આવી શક્યા ન હતા.
પોલીસે જણાવ્યું છે કે અનુસાર આગમાં ફસાયેલા 6 લોકોના મોત થયા છે તેમજ ઘણા લોકોને બચાવવામાં આવ્યા છે. ઈજાગ્રસ્તોને હોસ્પિટલમાં દાખલ કરવામાં આવ્યા છે. ફાયરની ત્રણ ગાડીઓ ઘટનાસ્થળે આગ ઓલવવાનો પ્રયાસ કરી રહી છે. ઘટના સ્થળેથી સામે આવેલા વીડિયોમાં જોઈ શકાય છે કે આગની જ્વાળાઓ જોવા મળી રહી છે. ધુમાડાના ગોટેગોટા થઈ રહ્યા છે અને સ્થાનિક લોકો ફાયર ફાઈટરની સાથે આગ ઓલવવાનો પ્રયાસ કરી રહ્યા છે. આગ એટલી ભયાનક હતી કે આકાશમાં ધુમાડાના ગોટેગોટા દૂર દૂરથી પણ જોઈ શકાતા હતા. આજુબાજુમાં બીજા પણ ઘણાં મકાનો અને ઘર છે, પરંતુ હાલમાં નજીકના મકાનોને કોઈ નુકસાન થયા હોય તેવા સમાચાર મળ્યા નથી.
વીડિયોમાં જોઈ શકાય છે કે ફાયર ફાઈટર ઈમારતમાં ફસાયેલા લોકોને બચાવી રહ્યા છે. ઈમારતની અંદર ફસાયેલા લોકોને બહારથી સીડીઓ લઈને બહાર કાઢવામાં આવી રહ્યા છે. જો કે બિલ્ડિંગની નજીક ખૂબ જ આગ ફેલાયેલી હતી. આ અકસ્માતમાં અનેક વાહનો બળીને રાખ થઈ ગયા હતા. અનેક ટુ-વ્હીલર્સમાં પણ આગ લાગી ગઈ હતી. બિલ્ડિંગની બહાર પાર્ક કરેલી એક કાર પણ સળગી ગઈ હતી. હજુ સુધી એ સ્પષ્ટ થયું નથી કે કાર અને ટુ-વ્હીલર બિલ્ડિંગમાં રહેતા લોકોના હતા કે, રિપેરિંગ માટે પાર્ક કરવામાં આવ્યા તે હતા.
ફાયર ફાઈટરોએ ઈમારતમાં ફસાયેલા લોકોને બચાવ્યા બાદ આગ પર કાબૂ મેળવી લેવામાં આવ્યો છે. ઘણા સમય અને પ્રયત્નો બાદ ફાયર ફાઈટરોને આગ ઓલવવામાં સફળતા મળી હતી. આ પછી બિલ્ડિંગમાંથી જોરદાર ધુમાડો જોવા મળી રહ્યો હતો. સ્થળ પર સ્થાનિક પોલીસ પણ હાજર રહ્યા હતા. આ દરમિયાન મકાનની અંદરથી સીડીનો ઉપયોગ કરીને ઘરની બારીમાંથી બહાર કાઢવામાં આવ્યા હતા. મહિલાઓ અને બાળકોને પણ આવી રીતે જ બહાર કાઢવામાં આવ્યા છે. અકસ્માતમાં ઘાયલ થયેલા લોકોને નજીકની હોસ્પિટલમાં દાખલ કરવામાં આવ્યા છે, જ્યાં તેમની સારવાર ચાલી રહી છે.