અમદાવાદ, શહેરમાં સાયબર અપરાધીઓ અવનવી તરકીબો અજમાવી નિર્દાેષ નાગરિકોને ચૂનો લગાવી રહ્યા છે. તાજેતરમાં ન્યૂ નરોડા વિસ્તારમાં રહેતા અને એક ખાનગી ફાર્મા કંપનીમાં માઇક્રો બાયોલોજિસ્ટ તરીકે ફરજ બજાવતા યુવકને ક્રેડિટ કાર્ડની લિમિટ વધારવાની લાલચ આપી ભેજાબાજોએ તેના ખાતામાંથી ૨.૨૯ લાખ ટ્રાન્સફર કરી લીધા હોવાની ઘટના સામે આવી છે.
આ અંગે કૃષ્ણનગર પોલીસ સ્ટેશનમાં અજાણ્યા શખ્સો વિરુદ્ધ ગુનો નોંધવામાં આવ્યો છે. ન્યૂ નરોડામાં પ્રમુખ એવન્યુ ખાતે રહેતા કૃણાલભાઈ પટેલ ગત ૨૪ ફેબ્›આરીના રોજ ઘરે હાજર હતા, ત્યારે સાંજે તેમના મોબાઈલ પર એક અજાણ્યા નંબર પરથી ફોન આવ્યો હતો. ફોન કરનારે પોતે એક્સિસ બેંકનો કર્મચારી હોવાની ઓળખ આપી હતી અને જણાવ્યું હતું કે, તેમના ‘મેક્સ અમેરિકન એક્સપ્રેસ’ ક્રેડિટ કાર્ડની લિમિટ વધારવા માટે કંપની તરફથી ખાસ ઓફર છે.
ઠગબાજોએ કૃણાલભાઈને વિશ્વાસમાં લઈ મોબાઈલમાં બેંકની એપ્લિકેશન ખોલાવી હતી. કાર્ડની લિમિટ ૨.૩૮ લાખથી વધારીને ૪ લાખ કરી આપવાની પ્રોસેસ કરવાના બહાને ફોન ૧૦થી ૧૨ મિનિટ સુધી ચાલુ રાખ્યો હતો. આ દરમિયાન ભેજાબાજોએ કૃણાલભાઈની જાણ બહાર તેમના કાર્ડમાંથી બે અલગ-અલગ ટ્રાન્ઝેક્શન દ્વારા કુલ ૨,૨૯,૭૦૦ ઉપાડી લીધા હતા.
આ અંગેનો મેસેજ આવતા જ છેતરાયા હોવાનો અહેસાસ થતા કૃણાલભાઈએ તાત્કાલિક કાર્ડ બ્લોક કરાવ્યું હતું અને સાયબર ક્રાઈમ હેલ્પલાઇન ૧૯૩૦ પર જાણ કરી હતી. વતનમાં ધાર્મિક પ્રસંગ હોવાથી પરત આવ્યા બાદ તેમણે વિધિવત રીતે કૃષ્ણનગર પોલીસમાં ફરિયાદ નોંધાવતા પોલીસે તપાસ આદરી છે.SS1MS
