મુંબઈઃ રિટેલ લોનમાં 2023ના અંતમાં વાર્ષિક ધોરણે 18 ટકાની વૃદ્ધિ જોવા મળી છે અને અસુરક્ષિત લોનમાં પણ સતત વધારો થયો છે. રિઝર્વ બેંક ઓફ ઈન્ડિયા (RBI)ના ડેટા અનુસાર, વ્યક્તિગત લોનમાં 22 ટકાનો વધારો થયો છે, જ્યારે ક્રેડિટ કાર્ડ દ્વારા ખર્ચમાં 28 ટકાનો વધારો થયો છે.
2023ના અંતે ભારતમાં ક્રેડિટ કાર્ડની કુલ સંખ્યા 9.40 કરોડ હતી અને કાર્ડ દીઠ સરેરાશ ખર્ચ રૂ 5577 હતો. ગયા વર્ષે વ્યક્તિગત લોન વિતરણની સરેરાશ રકમ રૂ. 1.71 લાખ હતી.
ઊંચા વ્યાજ દરો અને ફુગાવા વચ્ચે પણ લોનની માંગ વધી છે.
અસુરક્ષિત લોનમાં સતત વધારાને ધ્યાનમાં રાખીને, રિઝર્વ બેંકે ગયા વર્ષે વિશેષ પગલાં લીધા હતા અને બેંકો અને NBFCs માટે જોખમ વજનના ધોરણોમાં વધારો કર્યો હતો.
ધોરણોમાં ફેરફારથી બેન્કો અને NBFC ને જોખમી લોન માટે ઉચ્ચ મૂડી અનામત જાળવવાની ફરજ પડી છે. જોખમનું વજન, જે અગાઉ 100 ટકા હતું, તેને વધારીને 125 ટકા કરવામાં આવ્યું છે.
રિટેલ લોનમાં હાઉસિંગ લોનનો સૌથી વધુ હિસ્સો 47 ટકા હતો અને ગયા વર્ષે તે વાર્ષિક ધોરણે 14.50 ટકા વધીને રૂ. 2.14 લાખ કરોડ થયો હતો. ઓટો લોન 20 ટકા વધીને રૂ. 5.53 લાખ કરોડ થઈ છે. પર્સનલ લોન અને ક્રેડિટ કાર્ડનો હિસ્સો 1.37 ટકા વધીને 33 ટકા થયો છે.
રિઝર્વ બેંક ઓફ ઈન્ડિયાના ડેટા અનુસાર, વ્યક્તિગત, ઘર, ક્રેડિટ કાર્ડ અને ઓટો લોનમાં એકંદરે 18 ટકાનો વધારો થઈને રૂ. 41.97 લાખ કરોડ થયો છે. ગયા વર્ષે કન્ઝ્યુમર ડ્યુરેબલ લોનનો ગ્રોથ રેટ 7.70 ટકા હતો જે 2022માં 41.40 ટકા જોવા મળે છે.