આજે બનાસકાંઠા જિલ્લાના દિયોદરના મુલકપુર પાસે પોલીસ પર હુમલો કરીને અજાણ્યા લોકોએ એક યુવતીનું અપહરણ કરી લેતા ચકચાર મચી ગઈ હતી. થોડા સમય પહેલા યુવતીના પ્રેમ લગ્નના કારણે આ ઘટના બની હોવાનું સામે આવ્યું છે. પોલીસ યુવતી અને તેને લઈ જનારા લોકોની શોધમાં છે. આ મામલે પોલીસમાં ફરિયાદ નોંધવાનો પ્રયાસ કરવામાં આવ્યો છે. દિયોદરના ડીએસપીએ ‘દિવ્ય ભાસ્કર’ને જણાવ્યું કે યુવતીએ અન્ય સમાજના યુવક સાથે લગ્ન કર્યા હતા. લગ્નથી નારાજ થઈને તેના પરિવારજનો યુવતીને ઘરે લઈ આવ્યા અને અન્ય જગ્યાએ તેના લગ્ન કરાવી દીધા. પરંતુ, યુવતી જે યુવકને પ્રેમ કરતી હતી તેની સાથે રહેવા માંગતી હતી અને તેણે યુવકનો સંપર્ક કર્યો હતો. આવી સ્થિતિમાં યુવતીના પરિજનોએ જ્યારે સિહોરી પોલીસ સ્ટેશનમાં તેમની દીકરી ગુમ થયાની અરજી આપી ત્યારે યુવતીએ પણ પોલીસને અરજી આપી જણાવ્યું કે તે યુવક સાથે પોતાની મરજીથી રહે છે. આ કેસમાં દિયોદર પોલીસ બીટના મહિલા સહિત બે પોલીસકર્મીઓ યુવતીને નિવેદન નોંધવા સિહોરી પોલીસ સ્ટેશન લઈ ગયા હતા. પોલીસ યુવતી અને છોકરાને સિહોરી પોલીસ સ્ટેશન લઈ જઈ રહી હોવાની જાણ યુવતીના સંબંધીઓને થતાં આરોપીઓએ દિયોદરના મુલકપુર નજીક યુવતી અને પોલીસ જે વાહનમાં જઈ રહ્યા હતા તે વાહન રોક્યું હતું. આ પછી વાહનમાં તોડફોડ કરવામાં આવી હતી અને પોલીસકર્મીઓ સાથે પણ મારપીટ કરવામાં આવી હતી. આરોપીએ યુવતીને પોલીસના કબજામાંથી છોડાવી અને પોતાની કારમાં બેસાડી ઘટનાસ્થળેથી ભાગી ગયો. આ સમગ્ર ઘટનાનો વીડિયો પણ સોશિયલ મીડિયા પર વાયરલ થયો છે. પોલીસે આ મામલે અજાણ્યા લોકો સામે ગુનો નોંધી તપાસ હાથ ધરી છે. આ સમગ્ર ઘટનાને નજરે જોનાર એક સાક્ષીએ જણાવ્યું કે એક બાજુથી એક કાર આવી જેમાં 6 થી 8 લોકો સવાર હતા. તેણે નીચે ઉતરીને કારમાં બેઠેલી યુવતીને ઉપાડી અને તેને પોતાની કારમાં બેસાડી. અજાણ્યા શખ્સોએ પોલીસકર્મીઓ અને યુવકો પર હુમલો કરી કારમાં તોડફોડ કરી બાદમાં દિયોદર તરફ ભાગી ગયા હતા.