નવી દિલ્હી, 20 સપ્ટેમ્બર (હિ.સ.) એશિયન ડેવલપમેન્ટ બેંક (ADB) એ ચાલુ નાણાકીય વર્ષ 2023-24 માટે ભારતની આર્થિક વૃદ્ધિનું અનુમાન 6.4 ટકાથી ઘટાડીને 6.3 ટકા કર્યું છે. કૃષિ પેદાશો પર પ્રતિકૂળ ચોમાસાની સંભવિત અસર અને નિકાસમાં મંદીને કારણે ADBએ આ કાપ મૂક્યો છે.
એશિયન ડેવલપમેન્ટ આઉટલુક સપ્ટેમ્બર 2023 શીર્ષકના અહેવાલમાં બુધવારે ADBએ નાણાકીય વર્ષ 2023-24 માટે ભારતનો આર્થિક વિકાસ દર 6.4 ટકાને બદલે 6.3 ટકા રહેવાનો અંદાજ મૂક્યો હતો. અહેવાલ મુજબ, મજબૂત સ્થાનિક વપરાશ અને સુધારેલ ગ્રાહક સેન્ટિમેન્ટ ચાલુ નાણાકીય વર્ષના બાકીના સમયગાળામાં અને આગામી નાણાકીય વર્ષમાં પણ ભારતના વિકાસ દરને મજબૂત બનાવશે.
જો કે, એડીબીએ આગામી નાણાકીય વર્ષ 2024-25 માટે ભારતના આર્થિક વિકાસ દરના અંદાજને 6.7 ટકા પર જાળવી રાખ્યો છે. ADBના રિપોર્ટ અનુસાર, ખાનગી રોકાણ અને ઔદ્યોગિક ઉત્પાદનમાં વધારો ગ્રોસ ડોમેસ્ટિક પ્રોડક્ટ (GDP) વૃદ્ધિને વેગ આપશે. આ સાથે, જાહેર મૂડી ખર્ચમાં મોટા પાયે વધારો પણ તેને મદદ કરશે.
નોંધનીય છે કે વર્તમાન નાણાકીય વર્ષ 2023-24ના પ્રથમ ત્રિમાસિક ગાળામાં (એપ્રિલ-જૂન) ભારતનો જીડીપી 7.8 ટકાના દરે વધ્યો હતો, જેમાં સેવા ક્ષેત્ર અને રોકાણમાં વધારો મહત્વની ભૂમિકા ભજવે છે. રિઝર્વ બેંક ઓફ ઈન્ડિયા (RBI)એ ચાલુ નાણાકીય વર્ષમાં જીડીપી વૃદ્ધિ દર 6.5 ટકા રહેવાનો અંદાજ મૂક્યો છે. તેના પાછલા નાણાકીય વર્ષ 2022-23માં ભારતનો આર્થિક વિકાસ દર 7.2 ટકા હતો.