તમે જ કહો કોની ભૂલ આમાં? Ahmedabad AMTS Bus Accident
શાહ આલમ ટોલ નાકા પાસે AMTS બસે મોપેડને અડફેટે લીધું, બે યુવતીઓ ઈજાગ્રસ્ત
રસ્તા પર ઉભા રહીને વાત કરવાની, ગમે ત્યાં વાહન પાર્ક કરવાની લોકોની આદતોને કારણે અમદાવાદમાં એસટી અને એ.એમ.ટી.એસ. ના ચાલકોને પારાવાર મુશ્કેલી પડે છે. આ ઉપરાંત ટુ-વ્હીલર ચાલકો રસ્તાની વચ્ચે વાહનો ચલાવતાં હોય છે જેને કારણે પણ અકસ્માતના બનાવો બને છે.
અમદાવાદ: શહેરના પૂર્વ વિસ્તારમાં આવેલા શાહ આલમ ટોલ નાકા પાસે આજે એક ભયાનક અકસ્માતની ઘટના સામે આવી છે. પુરપાટ ઝડપે આવી રહેલી AMTS બસે એક મોપેડને જોરદાર ટક્કર મારતા ગમખ્વાર અકસ્માત સર્જાયો હતો. આ દુર્ઘટનામાં મોપેડ પર સવાર બે યુવતીઓ બસની અડફેટે આવી જતાં ગંભીર રીતે ઈજાગ્રસ્ત થઈ હોવાના અહેવાલ છે.
મળતી માહિતી મુજબ, શાહ આલમ ટોલ નાકા પાસેથી પસાર થઈ રહેલી AMTS બસના ચાલકે સ્ટેયરિંગ પરથી કાબૂ ગુમાવતા આગળ જઈ રહેલા મોપેડને પાછળથી ટક્કર મારી હતી. ટક્કર એટલી જોરદાર હતી કે મોપેડ પર સવાર બંને યુવતીઓ રસ્તા પર પટકાઈ હતી. અકસ્માતને પગલે આસપાસના લોકો તાત્કાલિક મદદ માટે દોડી આવ્યા હતા.
CCTV વિડીયોમાં નજરે પડે છે કે, યુવતી રસ્તા નજીક ફૂટપાથ પાસે એક્ટીવાને બહાર ઉભી રાખીને પણ ટ્રાફિકની પરવા કર્યા વગર ઉભી રહી હતી અને પૂરપાટ ઝડપે રોંગસાઈડમાં જતાં AMTS ની ટક્કર વાગી હતી. (જૂઓ વિડીયો)
અકસ્માત બાદ ઘટનાસ્થળે લોકોના ટોળેટોળા ઉમટી પડ્યા હતા અને ભારે અફરાતફરી મચી ગઈ હતી. સ્થાનિકોએ તાત્કાલિક 108 એમ્બ્યુલન્સને જાણ કરી હતી, જેના દ્વારા ઈજાગ્રસ્ત યુવતીઓને સારવાર અર્થે નજીકની હોસ્પિટલમાં ખસેડવામાં આવી છે.
વ્યસ્ત ગણાતા શાહ આલમ વિસ્તારમાં અકસ્માતને કારણે વાહનવ્યવહાર ખોરવાયો હતો અને લાંબો ટ્રાફિક જામ સર્જાયો હતો. ઘટનાની જાણ થતા જ સ્થાનિક પોલીસ કાફલો ઘટનાસ્થળે પહોંચી ગયો હતો અને ટ્રાફિક હળવો કરવાની કામગીરી હાથ ધરી હતી. પોલીસે AMTS બસ ચાલક વિરુદ્ધ ગુનો નોંધી વધુ તપાસ શરૂ કરી છે.
શહેરમાં સતત વધી રહેલા AMTS અને BRTS બસના અકસ્માતોને લઈને સ્થાનિક રહીશોમાં તંત્ર સામે ભારે રોષ જોવા મળી રહ્યો છે.
