BJP MLAs Letter to CM: મધ્ય ગુજરાતના રાજકારણમાં ફરી એકવાર ગરમાવો આવ્યો છે. વડોદરા જિલ્લાના પાંચ ધારાસભ્યોએ સામૂહિક રીતે મુખ્યમંત્રીને પત્ર લખીને ગંભીર આક્ષેપો કર્યા છે કે સરકારી અધિકારીઓ તેમનું સાંભળતા નથી. ધારાસભ્યોએ પત્રમાં ઉલ્લેખ કર્યો છે કે સામાન્ય નાગરિક માટે સરકારી કચેરીમાં જવું એ યુદ્ધ જીતવા સમાન છે. કલેક્ટર, ડીડીઓ અને એસપી જેવા ઉચ્ચ અધિકારીઓ મનસ્વી રીતે વર્તે છે અને ધારાસભ્યો દ્વારા સૂચવવામાં આવેલા જનહિતના કામોને જાણી જોઈને વિલંબમાં મૂકે છે અથવા અવગણે છે.
પત્ર લખનારા પાંચ ધારાસભ્યોના આકરા પ્રહાર
આ વિવાદમાં ડભોઈના શૈલેષ મહેતા, વાઘોડિયાના ધર્મેન્દ્રસિંહ વાઘેલા, સાવલીના કેતન ઈનામદાર, કરજણના અક્ષય પટેલ અને પાદરાના ચૈતન્યસિંહ ઝાલાનો સમાવેશ થાય છે. ધારાસભ્યોનું કહેવું છે કે અધિકારીઓ સરકાર સમક્ષ બધું જ બરાબર હોવાનું ગુલાબી ચિત્ર રજૂ કરે છે પરંતુ વાસ્તવિકતામાં જનતા હેરાન થઈ રહી છે. પાદરાના ધારાસભ્ય ચૈતન્યસિંહ ઝાલાએ જણાવ્યું કે અધિકારીઓ સમયસર કચેરીમાં હાજર હોતા નથી અને રજૂઆત કરવા જતા લોકોને રાજકીય દબાણ ન લાવવાની ધમકી આપીને ભગાડી દેવામાં આવે છે.
રાજકીય વિશ્લેષકોની નજરે એક નવી પૅટર્ન
રાજકીય પંડિતો આ પત્રયુદ્ધને આગામી સ્થાનિક સ્વરાજ્યની ચૂંટણીઓ સાથે જોડીને જોઈ રહ્યા છે. વરિષ્ઠ વિશ્લેષક વિદ્યુત જોશીના મતે આ એક સુનિયોજિત રણનીતિ હોઈ શકે છે જેથી જનતાનો આક્રોશ સરકાર કે નેતાઓ પરથી હટાવીને અધિકારીઓ તરફ વાળી શકાય. ભાજપ જ્યારે પણ એન્ટી-ઇન્કમ્બન્સી એટલે કે સત્તાવિરોધી લહેરનો સામનો કરે છે ત્યારે નો-રિપીટ થીયરી અપનાવે છે, પરંતુ આ વખતે વહીવટી તંત્રને નિશાન બનાવીને જનતાની સહાનુભૂતિ મેળવવાનો પ્રયાસ થઈ રહ્યો હોવાની શક્યતા નકારી શકાતી નથી.
ભાજપના આંતરિક વિખવાદનો જૂનો ઇતિહાસ
વડોદરા ભાજપમાં જૂથવાદ અને વિરોધની આ ઘટના નવી નથી. વર્ષ ૨૦૧૮માં પણ મધુ શ્રીવાસ્તવ અને યોગેશ પટેલ જેવા દિગ્ગજ નેતાઓએ સરકાર સામે મોરચો ખોલ્યો હતો. ૨૦૨૪ની લોકસભા ચૂંટણીમાં પણ રંજનબેન ભટ્ટે ઉમેદવારી પાછી ખેંચવી પડી હતી જે પક્ષમાં રહેલા અસંતોષનું પરિણામ હતું. જોકે આ વખતે સાંસદ હેમાંગ જોશીએ જણાવ્યું છે કે તેઓ આ મુદ્દે ધારાસભ્યો સાથે ચર્ચા કરશે અને સંકલન સમિતિમાં પ્રશ્નો ઉકેલવા પ્રયત્ન કરશે. હાલમાં સરકાર અને પક્ષ આ ગંભીર મુદ્દે મૌન ધારણ કરીને બેઠા છે.
