Cannabis farming gujarat case: ઉત્તરાખંડ, ઉત્તર પ્રદેશ, હિમાચલ અને મધ્યપ્રદેશમાં સરકારની મંજૂરી સાથે ગાંજાનું ઉત્પાદન શક્ય છે, પરંતુ ગુજરાતમાં આ ખેતી સંપૂર્ણપણે ગેરકાયદેસર ગણાય છે. ગાંજાનું વાવેતર મળી આવતાં જ પોલીસ NDPS Act હેઠળ ગુનો દાખલ કરે છે. ઉત્તર ગુજરાતથી લઈને સૌરાષ્ટ્ર સુધી અનેક વિસ્તારોમાં ગાંજાના છોડ મળી આવ્યા છે અને મોટી યુનિવર્સિટીઓના કેમ્પસમાંથી પણ આવી ચોંકાવનારી ઘટનાઓ સામે આવી છે. તાજેતરમાં સ્ટેટ મોનિટરિંગ સેલે બોટાદ જિલ્લાના નાની વાવડી ગામે બે ખેતરમાં છુપાવી રાખેલી ગાંજાની ખેતી પકડી પાડી 99 લાખના છોડ કબજે કર્યા હતા.
રાજ્યમાં પ્રથમ વાર 1999માં કેસ નોંધાયો, યુનિવર્સિટીઓમાંથી પણ મળી ચૂક્યા છોડ
ગુજરાતમાં ગાંજાની ખેતીનો પ્રથમ કેસ 26 વર્ષ પહેલા ગુજરાત યુનિવર્સિટીમાં પ્રકાશમાં આવ્યો હતો. 1999માં સાંધ્ય દૈનિકમાં પ્રકાશિત સમાચાર બાદ CID Crime NDPS Cellએ કેમ્પસમાંથી ગાંજાના છોડ કબજે કરી પરપ્રાંતીય સિક્યુરિટી ગાર્ડ સામે કાર્યવાહી કરી હતી. 2023માં ફરી યુનિવર્સિટી વિસ્તારથી ગાંજાના છોડ મળતા ચર્ચા ગરમાઈ હતી. એ જ વર્ષે રાજકોટની મારવાડી યુનિવર્સિટીમાં પણ અજાણ્યા શખ્સે વાવેલા ગાંજાના છોડ મળી આવતા પોલીસે ગુનો નોંધ્યો હતો.
ગાંજાની ખેતી છુપાવવા ચતુરાઈથી અપનાવાતી રીતો, અનેક જિલ્લા પોલીસને મળ્યા મોટા જથ્થા
રાજ્યમાં ગાંજાની ખેતી છુપાવવા માટે ખેડૂત અને અન્ય વ્યક્તિઓ વિવિધ રીતો અપનાવતા જોવા મળ્યા છે. દાહોદમાં ડ્રોનથી શોધાયેલી 216 છોડની ખેતી હોય કે છોટા ઉદેપુરમાં ઝડપી પાડાયેલ 1.45 કરોડની કિંમતનો મુદ્દામાલ, પોલીસે અનેક સ્થાનો પર મોટા પ્રમાણમાં ઉત્પાદન પકડી પાડ્યું છે. પાટણ જિલ્લામાં તો એરંડાના પાકની આડમાં 500 કિલોના છોડ ઉગાડવામાં આવ્યા હતા. અમદાવાદ નજીક શેલા વિસ્તારમાં ભાડાના વૈભવી ફલેટમાં હાઈપ્રોફાઈલ ખેતી કરતા ત્રણ શખ્સની ધરપકડ પણ થઈ ચૂકી છે.
સ્ટેટ મોનિટરિંગ સેલમાં પ્રથમ વખત Cannabis Farmingનો કેસ નોંધાતા હલચલ
SMC પોલીસ સ્ટેશનમાં અત્યાર સુધી ડ્રગ્સ, કોકેઇન અને Arms Actના ગુનાઓ નોંધાતા આવ્યા છે, પરંતુ ગાંજાની ખેતીનો કેસ પ્રથમ વખત નોંધાયો છે. પોલીસને મળેલી ચોક્કસ બાતમી આધારે રાણપુર તાલુકાના નાની વાવડી ગામે દરોડા પાડવામાં આવ્યા હતા. કપાસના પાકની આડમાં વાવવામાં આવેલા 198 કિલો જેટલા 93 છોડ કબજે લેવાયા હતા. આ મામલે અજીતસિંહ બારડની ધરપકડ થઈ છે, જ્યારે અન્ય ત્રણ શખ્સો, જેમાં ભાગિયા અને ગાંજાના બીજ સપ્લાયરનો સમાવેશ થાય છે, તેમને ફરાર જાહેર કરવામાં આવ્યા છે.
