Digital Arrest Scam: હાલ સમગ્ર ગુજરાતમાં ‘ડિજિટલ એરેસ્ટ’ ના નામે એક ભયાનક સાયબર ફ્રોડ ચાલી રહ્યો છે. આ કૌભાંડમાં ઠગો પોલીસ, RTO, CID કે કસ્ટમ્સ અધિકારી બનીને ફોન કરે છે. તેઓ સામેની વ્યક્તિને જણાવે છે કે તેમના નામે કોઈ ગેરકાયદેસર પાર્સલ આવ્યું છે અથવા ડ્રગ્સ કે મની લોન્ડરિંગમાં તેમની સંડોવણી છે. ત્યારબાદ, વિડિયો કોલ (Skype અથવા WhatsApp) દ્વારા વ્યક્તિને ૨૪ થી ૪૮ કલાક સુધી સતત કેમેરા સામે બેસી રહેવા મજબૂર કરવામાં આવે છે, જેને ‘ડિજિટલ એરેસ્ટ’ કહેવામાં આવે છે. આ દરમિયાન ડર બતાવીને કેસ પતાવવાના નામે લાખો રૂપિયા પડાવવામાં આવે છે.
આંતરરાષ્ટ્રીય કાવતરું અને લોકલ લીડ્સ
આ કૌભાંડનું એપી સેન્ટર ભારત બહાર, ખાસ કરીને પાકિસ્તાન અને ગલ્ફ દેશોમાં હોવાનું મનાય છે. જોકે, આ સમગ્ર નેટવર્ક ભારતના સ્થાનિક ડેટા એજન્ટો વિના શક્ય નથી.
-
ડેટા ચોરી: ભારતના વિવિધ રાજ્યોમાં બેઠેલા એજન્ટો પૈસાની લાલચે નાગરિકોના ખાનગી ડેટા વિદેશી ઠગોને વેચે છે.
-
ટેલિગ્રામનો ઉપયોગ: કૌભાંડીઓ માટે ટેલિગ્રામ સૌથી સુરક્ષિત માધ્યમ છે, કારણ કે તેમાં લોકેશન અને આઈડેન્ટિટી ટ્રેસ કરવી મુશ્કેલ છે.
-
ગુજરાત કનેક્શન: અમદાવાદ અને ગાંધીનગરના ઇન્ફોસિટી વિસ્તારમાં ચાલતા કેટલાક કોલ સેન્ટરો શંકાના ઘેરામાં છે, જેઓ વિદેશી ડેટાની આપ-લેમાં સંડોવાયેલા હોઈ શકે છે.
ધમકી, ડર અને માનસિક ત્રાસ
ઠગો પીડિતને એટલી હદે ડરાવે છે કે વ્યક્તિ સામાજિક બદનામીના ડરથી કોઈને વાત કરી શકતી નથી.
૧. ફેક ડોક્યુમેન્ટ્સ: ઠગો ધરપકડના વોરંટ કે કોર્ટના નકલી ઓર્ડર વિડિયો કોલ પર બતાવે છે.
૨. ન્યૂડ કોલ ફ્રોડ: કેટલાક કિસ્સામાં સેક્સટોર્શન (Sextortion) નો સહારો લઈને અંગત તસવીરો વાયરલ કરવાની ધમકી આપી મોં માંગી રકમ વસૂલવામાં આવે છે.
૩. સોનાની ખરીદી: ક્રેડિટ કાર્ડના ડેટા ચોરી કરીને તેના પર સોનાની ખરીદી કરવાના કૌભાંડો પણ આ જ ટોળકી દ્વારા આચરવામાં આવે છે.
પોલીસ માટે ‘લોઢાના ચણા’ સમાન તપાસ
સાયબર ઠગો આઈટીના ભેજાબાજ હોવાથી તેમને ટ્રેસ કરવા પોલીસ માટે પડકારજનક છે. હજુ સુધી આ મામલે કોઈ મોટી ધરપકડ થઈ નથી, જે સુરક્ષા એજન્સીઓ માટે ચિંતાનો વિષય છે. આ એજન્ટો એટલા સતર્ક હોય છે કે તેઓ વારંવાર પોતાના સર્વર અને આઈપી એડ્રેસ બદલતા રહે છે. નિષ્ણાતોના મતે, જો પોલીસ પોતે એજન્ટ બનીને આ નેટવર્કમાં ઘૂસે તો જ આ આંતરરાષ્ટ્રીય રેકેટનો પર્દાફાશ થઈ શકે તેમ છે.
તમારા માટે સલાહ:
કોઈપણ સરકારી એજન્સી ક્યારેય વિડિયો કોલ પર ધરપકડ કરતી નથી કે પૈસાની માંગણી કરતી નથી. જો આવો કોઈ કોલ આવે, તો તુરંત ફોન કાપી નાખો અને ૧૯૩૦ નંબર પર સાયબર ક્રાઇમની જાણ કરો.
