Fake Jailer: સુરતમાં એક બિલ્ડરના કાકાસસરા વજરંગ જીલડિયાને તેના જ સગા જમાઈ જય ડાંગરે સાથીઓ સાથે મળી બ્લેકમેઇલ કરવાનો પ્રયાસ કર્યો હતો. મોર્ફ કરેલા ફોટા મોકલીને યુવતીને અને બિલ્ડરને ધમકાવવામાં આવતા પોલીસ ફરિયાદ નોંધાઈ. ફરિયાદ બાદ જય ડાંગર, પ્રશાંત કાછડિયા અને સ્મિત ધોળકિયાને કોર્ટના આદેશથી જેલ મોકલવામાં આવ્યા.
સોશિયલ મીડિયા પર ક્લિપ વાયરલ થતાં કેસ વકરી ગયો
આ કેસ સરતના મીડિયા અને સોશિયલ મીડિયા પર સતત ચર્ચામાં રહ્યો. આ વચ્ચે જ એક ઓડિયો ક્લિપ વાયરલ થઈ જેમાં આ ત્રણ આરોપીઓના સગાઓ પાસેથી જેલમાં સારી સુવિધાઓ આપવા માટે 15 હજાર રૂપિયા માંગ્યા હોવાનો આરોપ જેલર પરષોત્તમ ચાવડા પર મૂકાયો.
જેલર ચાવડાએ સ્પષ્ટ કર્યું કે જેલમાં આ પ્રકારની કોઈ ગેરરીતિ થતી નથી, અને આ કોલ નકલી હતો. આ અંગે સચિન પોલીસ સ્ટેશનમાં તરત ફરિયાદ નોંધાઈ.
નકલી જેલર કેવી રીતે પકડાયો?
પ્રાપ્ત થયેલો મોબાઇલ નંબર અમદાવાદનો હોવાનું જણાતાં અમદાવાદ SOGએ તપાસ હાથ ધરી. તપાસમાં બહાર આવ્યું કે આ કોલ નરેન્દ્ર ત્રિવેદી નામના વ્યક્તિએ કર્યો હતો, જે વર્ષોથી નકલી પોલીસ, નકલી વકીલ અને નકલી ઇન્કમટેક્સ ઓફિસર બની લોકોને છેતરતો હતો.
ડીસીપી ભરત રાઠોડના જણાવ્યા મુજબ નરેન્દ્ર ત્રિવેદી સામે અગાઉથી છ ગુના નોંધાયેલા છે અને તે હિસ્ટ્રી-શીટર છે.
Fake Jailer નરેન્દ્ર ત્રિવેદીનો છેતરપિંડીનો મોડસ ઓપરેન્ડી
અખબારમાં ચાલતા મોટા કેસો પર નજર રાખતો
કોર્ટમાંથી લોકો જેલમાં જાય ત્યારે પોતે નકલી વકીલ બની પોલીસ સ્ટેશને જતો
આરોપીના પરિવારજનોના નંબર મેળવી એમની માનસિક સ્થિતિનો લાભ લેતો
જેલર બની કહી દેતો : “જેલમાં સારી પાથારી-ભોજન જોઈએ તો 15 હજાર આપવા પડશે, નહીતર ટોર્ચર થશે”
આ રીતે તે ઘણા લોકો સાથે ઠગાઈ કરતો રહ્યો.
ઇસનપુર વિસ્તારમાં તેની હકીકત શું હતી?
નરેન્દ્ર ત્રિવેદી મૂળ સુરેન્દ્રનગરનો પરંતુ લાંબા સમયથી અમદાવાદના ઇસનપુરમાં રહેતો. પાડોશીઓ અનુસાર તે પોતાને ટાઇલ્સ દલાલ બતાવતો અને જૂનો ફોન વાપરતો જેથી તેની ઓળખ છુપાઈ રહે.
લોકો તેને ‘ચકો’, ‘રાજેશ’, ‘રાજુ’ જેવા નામોથી ઓળખતા. તેણે પોતાની પોલીસ અને જેલમાં ઓળખાણ હોવાની ખોટી ગાથા રચી અનેક લોકોને મૂર્ખ બનાવ્યા હતા.
પરિવારજનોનું કહેવું શું છે?
ત્રણેય આરોપીઓના પરિવારજનોએ માત્ર એટલું જ કહ્યું કે Truecaller પર નંબર “Lajpor Mahendrasinh Jailer” બતાવતો હતો, એટલે કોલ સાચો લાગે તે સ્વાભાવિક હતું.
હાલની સ્થિતિ
નરેન્દ્ર ત્રિવેદી હાલ પોલીસ કસ્ટડીમાં છે અને તેની વધુ પૂછપરછ થઈ રહી છે. પોલીસની આશંકા છે કે તેણે અનેક લોકોને આ જ રીતથી ઠગ્યા હોઈ શકે છે.
